Bonbonnière

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


D'n achtergievel vaan de Bonbonnière. Aon de pilasters kint me nog zien tot de gievel vreuger de veurgievel waor vaan de 17e-iewse Jezuïetekèrk.
'n In 1996 geplaotst reliëf op de huidege väörgievel.

De Bonbonnière in Mestreech is noe 'ne sjouwburg, mer is vreuger gebouwd es kèrk. De Bonbonnière ligk vlakbij 't Slevrouweplein. De sjouwburg weurt verheurt aon kemediegezèlsjape en d'r zien ouch fieszaole te heur.

Historie[bewirk | brón bewèrke]

In 1606 is zie gebouwd veur de orde vaan de Jezuïete. De rector vaan de orde had daoveur opdrach gegeve aon Peter Huyssens. De bouw doorde tot 1614 boenao zie in gebruuk is genome. In 1789 woort de kèrk aon de ieredeens oontrokke en woort zie umgebouwd tot sjouwburg. D'n ingaank laog in deen tied aan de Minckeleersstraot. De gievel waor verseerd mèt medaillonne en dorische zuile. Daobij woort 'n deil vaan 't Jezuïetekloester gesloop (1787) en is zoe de stroat 'Achter de Kemedie' oonstande. In 1955 is aon d'n eigeleke ingaank d'n toneeltore bove op 't gebouw gezat boedoor de gievel gaans aanders is koume oet te zien. D'n ingaank is toen verhuis nao d'n aandere kant.

De plefong vaan de groete zaol, 'n bolvörmege kap, woort op verzeuk vaan 't gemeintebestuur besjèlderd door Charles Eyck. Ouch 't brandsjerm wat de zaol moot aofslete vaan de buun in geval vaan brand is zier bezunder. De kunsteneer Ger Boosten heet in 1983 dao 't verhaol vaan Prometheus dee 't vuur tikde en aon de mins goaf op gesjèlderd. In e beutsje zit de maag vaan Mestreech die nao 't aajd Mestreech weurt gevare. Helaas is 't brandsjerm zelde of noets touw, dus kint niemes die veurstèlling zien. Nao get verbouwinge in de jaore '50, '60 en '70 - mèt in 1973 'n nui trappehoes - woort in 1996 de Bonbonnière weer geopend. De stadssjouwburg verhuisde in 1992 nao 't verbouwde Ginneraolhoes aon de Vriethof. Zoe kós de stadssjouwburg 900 plaotse beeje in plaots vaan 300. In 2004 woort de Bonbonnière euvergenome door de VVM Group. Zie laote 't gebouw gans restaurere.

De Bonbonnière is noe 'n fies- en evenementelocatie. Op de begane groond is 'ne 'Grand-theaterkaffee' gevested en de zoegenaomde spiegelzaol. Ouch gief 't aon de kant vaan de Breistraot 'n modebetik. Op de twiede etaasj gief 't de Kemediezaol en de Witte Zaol. Mèt de vastelaovend zien 't Grandkaffee en de Spiegelzaol ope gestèld veur de verkleiders en fiesvierend publiek.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Bonbonnière&oldid=341102"