Bassing

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


De Bassing is 'ne binnehave in 't Boschstraotkerteer, zjus ten noorde vaan de Binnestad. 't Is zuideleke eindpunt vaan de Zuid-Willemsvaart in Mestreech en woort in de jaore 1824-25 gegraove op de plaots vaan de vreugere bóngerd vaan 't kloester de Biesen. De verbinding tösse Bassing en Maos leep dweers door de aofgebroke kloesterkèrk. 't Talud mèt welfkelders woort in 1860 vervaange door 'ne steine moer.

Drie jaor nao d'n aonlègk waor de Bassing al te klein. De Kamer vaan Kouphandel vroog in 1828 al aon keuning Wöllem I veur outbreiing. In de jaore nao de Belzje Opstand (1830-39) bleve de klachte, woenao 'ne twiede have woort geboud in de Boschpoort.

Nao d'n aonlègk vaan 't Julianakenaal, de Beatrixhave en 't dempe vaan 't kenaal Luik-Mestreech raakde de Bassing in oonbruuk. In 2001 woort de have gerestaureerd en e paar jaor later in gebruuk genome es have veur plezeervaart. De werfkelders woorte in gebruuk genome door de middestand, veural restaurante. 't Monumentaal Veemgebouw oet 1860 bleef behawwe es appartemintecomplex.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Bassing&oldid=427884"