Aafsjloetdiek
Dit artikel is gesjreve (of begós) in 't AGL. Laes hie wie v'r mit de versjillende saorte Limburgs ómgaon.
De Aafsjloetdiek (Nederlandjs: Afsluitdijk, Fries: Ofslútdyk, Wes-Fries: Ofsluitdoik) is 'n waterkieëring in Nederlandj tösje Den Oever in Naord-Hollandj en Zurich in Frieslandj die 't Iesselmeer aafsjlut van de Waddezieë. Hieraan óntlient de waterkieëring häör naam. De ganse diek is 32,5 km lank en óngevaer 90 m wied. 't Waterkieërende deil van de diek is 30 km lank. De Aafsjloetdiek is wichtig veur 'n deil van Nederlandj taengen euversjtrouminge te besjirme.
De Aafsjloetdiek is 'n óngerdeil van de Zujerzieëwerke. In 1927 woort begós mit d'n aanlèk. In 1932 woort 't lèste sjloetlaok, de Vlieter, gesjlaote. Mit 't aafmake van de Aafsjloetdiek verangerde de zaute Zujerzieë in 't zeut Iesselmeer. E jaor later woort hae aopegesjtèld veur 't waegverkieër. Beidskenj van de Aafsjloetdiek ligke sjöt- en sjpuisjloeze. Taenge Naord-Hollandj zeen dit de Stevinsjloeze. Op Kornwerderzand, ruum 4 km van 't Fries vastelandj, ligke de Lorentzsjloeze.
Euver de Aafsjloetdiek löp 'ne verkieërswaeg en e fietsepaad die de provinse Naord-Hollandj en Frieslandj mit ein verbènje.