Wonck

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Romaanse kerk in Wonck mèt kèrkhof

Wonck (Vlaams: Wonk) ies 'n deilgemeinte in de gemeinte Bitsingen (Bassenge) in de provincie Luuk in Wallonië op 't Belsj. Door 't dörp sjtruimp de Geer.

Bezeenswaerdig

• Bezeenswaerdig ies de kèrk mèt helsjteine romaanse tore oet de 12 ièw en de mergele achterboew mèt róntelum 't kèrkhof. Ze ies gewiejd aan de heilige Lambertus. 'n Doupvont in de kèrk ies ouch oet de 12 ièw. Typisch op de graafsjtein en kruzer zint de extra sjtein mèt de lètste wunsje van vrung en kènnisse veur de euverledene.
• De pastorie dateert gedeiltelik oet de 17e ièw.
• 'n Mergele carréboerderie tegeneuver de kèrk dreug 't jaortal 1663 en de lèttersj "café", dat in vreuger jaore onderdeil waor van 't geboew. Daoneve liegke d'r nog ander gesjlote boerderieje oet de 18e en 19e ièw.
• De watermeule Jorissen, 'n koremeule, ies gelege aan de Geer. 't Geboew sjtamp oet de 13e ièw. De hudige geboewe, oet 1830, zint opgetrokke oet natuursjtein (de basis) en baksjtein.
• 'n Ander watermeule, van Deborre, aan de Geer sjtamp oet 1716.

Evenemente

In Wonck weurt eder jaor 'n ambachtelike kaersjmert georganiseerd in de grotte van Wonck. Dees door de luuj oetgekapde mergelgrotte woorte jaorelank geëxploiteerd veur de winning van mergel en silex en in de twiède waereldoorlog gebruuk es toevlöchsoord veur de beweunersj.