Szeged

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


De dom van Szeged.

Szeged is mit 161.291 inwoeaners (2014) de daarde stad van Hóngarije (nao Boedapest en Debrecen). De stad lègk óp de over van de Tisza, veurbie de plaats wo deze samevlöitj mit de Mureş (Hóngaars: Maros) en in de naobieheid van zoeawaal de Sèrvische es de Roemeense grens. De stad is de höidstad van 't comitaat Csongrád.

Szeged waerdje in 1879 groeatedeils verwoos door 'n euverstrouming van de Tisza, wonao de stad in 'ne veur daen tied moderne stiel waerdje hèrboewdj. Ópvallendje elemènte zeen 't straoteplan mit 'ne róndjwaeg en radiaalwaeg, en de väöl geboewe in neostiele. De róndjwaeg dreug de name van de stej die biedroge aan de wederópboew.

De ópvallendjste geboewe in de stad zeen de dom, 'n neoromaans votiefkèrk die in 1930 klaorkoom, 't stadhoes aan 't boumriek Széchenyiplein (1893-1895, óntwórpe door Ödön Lechner) en de Nuuj Synagoog oet 1903, die es ein van de sjoeanste van Europa kan waere gezeen.

Szeged is sins 1921 universiteitsstad: in det jaor waerdje de Hóngaarstaolige universiteit vanoet de stad Cluj (Hongaars: Kolozsvár) nao Hóngaars gróndgebied euvergebrach, naodet Cluj aan Roemenië waas toebedeildj.

Óp 't plein veure dom vindj jaorliks e aopelóchfestival plaats mit theater-, opera- en balletveurstèllinge.

Szeged haet 'n belangrieke vodingsmiddelenindustrie en is beroemp óm twieë typisch Hóngaars producte: salami en paprika. De plaatselike keuke bi-jtj 'ne vermaardje vissóp, de szegedi halászlé.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Szeged&oldid=372894"