Cluj-Napoca

Van Wikipedia
Gank nao: navigatie, zeuke

Dit artikel is gesjreve in 't Mofers. 't Weurt gewaardeerd óm in dit artikel 't Mofers aan te hauwe of aan te gaeve welk anger dialek gebroek is.


Oetkiek op 't centrum van de stad.

Cluj-Napoca of kórtwaeg Cluj (Hóngaars: Kolozsvár, Pruus: Klausenburg) is 'n stad in Roemenië, gelaenge in Transsylvanië aan de Kleine Someş (Someşul Mic). 't Is de höidstad van 't distrik (judeţ) Cluj en haet zoeaget 333.000 inwoeaners. Ouch is 't de groeatste stad in 't streikgebied Transsylvanië.

Naam[bewirk | brontekst bewerken]

D'n aaje naam van de stad is Cluj (spraek oet es kloezj). In 1974 waerdje -Napoca aan d'n officiële naam toegevoog, womit d'n dèstiedse president Ceauşescu wól óngerstreipe det d'n oearspróng van de stad op de Dacisch-Romeinse nederzètting Napoca zów trökgaon. In alledaags, neet-officieel taalgebroek wuuertj de stad daotaenge nag ömmer Cluj genömp.

D'n officiële naam van 't gelieknamig distrik Cluj waerdje neet verangerdj.

Bevólking[bewirk | brontekst bewerken]

Cluj-Napoca is van vreuger oet 'n stad mit 'ne zieër gemingdje bevólking. Lank höbbe Pruse en Hóngare d'r de deens oetgemaak. Zjuus in 1918 koom de stad in Roemeense henj. De verhajingen tösje de versjillendje bevólkingsgruup leep meh lestig: nao de val van Ceauşescu waerdje de stad van 1992 toet 2004 bestuurdj door de nationalistische burgemeester Gheorghe Funar, dae ónger mieë naam maakdje door straotmeubilair in de Roemeense nationale kläöre te laote euversjèljere. Ónger 't nuuj bewindj van de hujige burgemeester Emil Boc verangerdje 't straotmeubilair stèds mieë van roead, gael, blauw nao roead mit wit. Taengewuuerdig is Cluj e veurbeildj van 'ne good-functionerendje multiculturele samelaeving. Naeve de al aanwezige Hóngare en Pruse laeve d'r ouch väöl anger nationaliteite in Cluj, dankzij de aantrekkendje economie. 't Aandeil van de Hóngare in de bevólking van de stad is in de loup van de 20en ieëuw geslónke van ruum 80% in 1910 toet minder es 20% noe. 't Aantal Pruse is nag kleinder.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Cluj-Napoca&oldid=341293"