Steve Jobs

Van Wikipedia

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


Steve Jobs

Steven Paul Jobs (24 fibberwarie 1955 - 5 oktober 2011) waor 'ne Amerikaanse software-óntwiekkelaer. Hae waor bekènd doordat hae same mèt Steve Wozniak Apple Computer Inc. opgeriech haet.

Leve[bewirk | brón bewèrke]

Jobs woort in 1955 gebore in Green Bay in de sjtaat Wisconsin es Steven Paulis. Sjnel nao zien geboorte woort hae geadopteerd door de Californische familie Jobs. Ziene ónbekènde biologische pap sjtamde oet Egypte. In 1991 trouwde Jobs mèt Laurene Powell en kreeg mèt häör 3 kinger. Wiejer houw Jobs nog ein dochter oet ein ièrder relatie, Lisa. Nao häör ies de Apple-computer mèt dezelfde naam geneump.

In 1974 góng Jobs wèrke veur de firma Atari, woa hae same mèt Wozniak computersjpeller óntworpe haet. Mèt Wozniak en Wayne sjtiechde Jobs in 1976 't bedrief Apple Computer, in de graasj van de familie Jobs in Palo Alto. 't Ièrsjte produk, de Apple I waor nog gei groat succes, meh e jaor later begoes me mèt de succesvol Apple II-serie. Dit waor de ièrsjte computer dae ouch in klein bedriever in de Vereinigde Sjtate gebruuk woort. Jobs haet d'r ouch veur gezörg dat de ièrsj sjlech loupende Apple Lisa-serie en de Macintosh de grafische interface van Xerox PARC euvernaome.

In 1985 góng Jobs weg bie Apple en begoes hae 't bedrief NeXT, dat ziech bezighèlt mèt 't óntwiekkele van innovatief hardware en software. Wiejer góng Jobs ouch bie Pixar wèrke. In 1996 koch Apple NeXT veur 400 miljoan dollar. Vanaaf 1997 góng hae in de raod van besjtuur en saer september van dat jaor woort hae algemein directeur (CEO of Chief Executive Officer) ad interim. 't Door NeXT óntwiekkelde besjturingssysteem NeXTSTEP woort wiejer óntwiekkeld tot Mac OS X. Jobs haet deveur gezörg dat Apple sjterk truukkaom mèt produkte wie de iMac, iPod en iTunes, veurbeelde van zoagenaamde "digital lifestyle". Hiedoor kreeg hae de bienaam "iCEO".

Saer januari 2000 waor Steve Jobs officieel algemein directeur (CEO) van Apple, meh hae kreeg nog mer eine dollar loan per jaor. De wins die hae kreeg maakde häöm èvvel volges de San Francisco Business Times tot "Most Overpaid CEO". Me sjatde zie vermoge op 3 miljard dollar.

Krenkde[bewirk | brón bewèrke]


De volgende sectie van dit artikel is gesjreve in 't Mestreechs.

Op 14 jannewarie 2009 maak Jobs bekind tot heer tot eind juni 2009 mèt verlof geit weges 'n krenkde. In 2004 is heer al 'ns geopereerd aon 'ne zeldzame tumor aon de alvleisklier. Eind 2008 verleert heer väöl gewiech, mer heet liet wete las vaan hormonestoringe te höbbe. Vanwege de väöle spikkelaties tot heer neet mie lang te leve zouw höbbe, beslut heer zien werk veurluipeg neer te lègke, umtot heer vint tot de spikkelaties häöm en de lui bij Apple hindere in zien/hun werk[1].

In aprèl 2009 heet heer 'n levertransplantatie oondergaange.[2]

Op 24 augustus 2011 trejt Jobs trök es CEO vaan Apple, mer woort op eige verzeuk aongeweze es veurzitter vaan de raod vaan bestuur. Op 5 oktober 2011 liet zien familie wete tot Jobs "in vrei" gestorve is, umringk door zien familie.[3]

Referenties[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Steve_Jobs&oldid=433836"