Kreeg Hamas-Israël (2023-2024)
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
 |
D'n inhawd van dit artikel kan naovenant gauw verangere en kan mesjiens neet gans mie kloppe mit de lèste óntwikkelinge. |
D'r kreeg tusje Hamas en Israel (2023-2024) begós óp d'r 7e oktober 2023 mit 'ne groeëtsjalige raketaanval en 'ne inval va terreurorganisatie Hamas en verwante milities in de Israelische grensgebede róndum de Gazasjtrook. Óngevier 3.000 militante sjtoke op versjeie manere de grens uuever tusje de Gazasjtrook en Israel, oeënoa ze hóngerde burgesj in de versjeie dörpkes en kibboetzim langs de grens en óp e festivalterrein doeëdmaakde en giezelde. 't Israelisch leger kós de mieëtste gebede óp d'r 8e en 9e oktober truukverovere óp de militante. Ooch weëd gevochte óp g'ne Westelike Jordaankank en aa g'n grens mit Syrië en Libanon. Israel reageert wiejer mit zjwoar bombardemente óp Gaza en 'n totaal blokkaasj.
Dizze kreeg versjilt van anger escalaties durch d'r umvank en de heftigheed van 't geweld. Vuur 't ieësj i joare zint Israelische gebede (kót) i heng gekoame va Hamas en kóste militante e groeët aantal burgesj boete Gaza doeëdmake. Wiejer woeëd vuur 't ieësj seër de Israelische truuktrekking in 2005 'n totaal blokkaasj aangekóndig, mit versjlechtering van de humanitair situatie tot gevolg. Via Egypte weëde hulpgoedere noa de burgesj i Gaza gebrach.
I reaksie óp d'r ival woeëd officieel d'r sjtaat va kreeg oetgeroepe, e kreegskabinet samegesjteld en 300.000 reserviste gemobiliseerd, die de Gazasjtrook umsingele. Óp d'r 13 oktober hat Israel de bewuuenesj va Gaza ópgeroepe um 't noorde va g'n sjtrook te evacuere. Seër deë daag deeg 't Israelische leger 't gebeed regelmieësig binnevalle. Óp d'r 27 oktober veel 't Israelisch leger 't noorde va g'n Gazasjtrook binne en begós 't Gaza-sjtad te umsingele. Tiedes e zesdaags sjtaak't-vure woeëde mieës 100 gegiezelde oetgewisseld teëge zieëker 240 Palestiense gevangene.
Óp d'r 1e december woeëde de gevechte hervat en seër doe verplaatsjt 't sjtriedtonieël zich almieëlich noa de zudelige sjtad Khan Yunis, wie me óp 't keëtje kint zieë.
Begin 2024 goof 't plane vuur 'ne aaval óp de sjtad Rafah, aa g'n grens mit Egypte. Versjillende leng, woe-ónger de VS, hant Israel ópgeroepe um dit offensief te sjtake. Momenteel leëve doa ca. 1,4 mieljoeën luuj, hoofzakelig vlöchtelinge oet 't midde en 't noorde van de Gazasjtrook.