Joeri Gagarin

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Joeri Gagarin

Joeri Aleksejevitsj Gagarin (Russisch: Юрий Алексеевич Гагарин) (Kloesjino, 9 miert 1934 – kortbij Moskou, 27 miert 1968) waor 'ne kosmonaut (de Russische benaoming veur astronaut). Heer waor d'n ierste mins in de ruimte wie heer op 12 aprèl 1961 woort gelanceerd aon boord vaan de Vostok 1.[1]

Biografie[bewirk | brón bewèrke]

Gagarin woort gebore in e dörp kortbij Gzjatsk in de oblast Smolensk. Heer waor piloot in de Russische lochmach en woort in 1960 geselecteerd, same mèt 19 collega's, veur de ierste gróp die de training en opleiding tot ruimdevaarder gónge volge. In ierste instantie woort German Titov gekoze veur de ierste bemande ruimdevlöch, mer umtot de autoriteite ziene naom te Duits voonte klinke, woort Gagarin geselecteerd veur de lancering in de Vostok 1. Heidoor woort heer de ierste mins in de ruimde. Vaanaof 1962 deende heer es representant in d'n Opperste sovjet.

Gagarin woort opgeleid es reservebemanning veur de Sojoez 1, de vlöch die op 24 aprèl 1967 rampzaoleg eindegde mèt d'n doed vaan 't einege bemanningslid, Vladimir Komanov. Gagarin woort ouch geselecteerd veur de training veur 'n missie nao de maon. Die missie höbbe de Russe oeteindelek aofgelas.

't Gief hardnekkege complottheorieë tot veur Gagarin minstens twie aander Russe in de ruimde zien gewees, boe-oonder Vladimir Iljoesjin. Dees veurgengers zouwe evels zwoer gewond zien geraak of 't zelfs neet euverleef höbbe. Bewies wat heiveur aongevoerd woort bleek allemaol gefingeerd.

Gagarin kaom op 27 miert 1968 op 34-jaorege leeftied um 't leve bij 'n oongelök mèt 'ne Mig-15 tijdens 'n routinevlöch kortbij Moskou. Gagarin waor getrouwd en had twie kinder. Heer is begraove bij de moer vaan 't Kremlin. Eder jaor weurt dao op 12 aprèl, d'n daag vaan de kosmonaute, 'ne krans gelag. 't Kosmonautetrainingscentrum Joeri Gagarin in Starestad bij Moskou is nao häöm verneump. Ouch de stad Gzjatsk, kortbij zien geboortedörp, woort in 1968 umgeduip in Gagarin.

  1. Wilson, Jim (2011-04-13). "Yuri Gagarin: First Man in Space" (in en). 
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Joeri_Gagarin&oldid=459267"