Jackson Pollock

Van Wikipedia
Gank nao: navigatie, zeuke

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.


Jackson Pollock (28 januari 1912 - 11 augustus 1956) waor 'ne belangrieke Amerikaanse kunssjilder. Me rekent häöm tot de sjtielrichting action painting en tot 't abstrak expressionisme.

Pollock woort gebore in Cody in de sjtaot Wyoming en greujde op in Arizona. In 1923 bezoch hae 'n indianereservaat en zoog hae de kuns van de indiane, die väöl indruk op häöm maakde en woavan hae motieve in zien werk zou opnumme. Hae sjtudeerde aan de Manual Arts High School in Los Angeles. In 1929 verhuusde hae nao New York, woa hae góng sjtudere aan de Art Students’ League ónder Thomas Hart Benton. Pollocks vreug werke sjtonge ónder invlood van de naturalistisch wèrkende Benton en de Mexicaanse muraliste David Alfaro Siqueiros en Diego Rivera. Hae begoes ziech èvvel ouch te intersere veur Europese sjtruiminge wie kubisme en surrealisme, die ouch invlood op zien sjtiel zouwe kriege. Ouch 't werk van Pablo Picasso inspireerde häöm.

Zien ièrsjte solo-tentoansjtèlling mèt veural surrealitisch georiënteerd werk woort in 1943 georganiseerd mèt sjteun van Peggy Guggenheim. In 1944 trouwde Pollock mèt Lee Krasner. Zie gónge same wone in The Springs (East Hampton). Zien vrouw góng wèrke, zoadat Pollock ziech op zien sjilderieje koes concentrere. Hae begoes vanaaf 1946 groate werke te make woabie hae 't dook op de grónd lag en mèt action painting-technieke de verf op 't dook goajde en leet drupe en 't daonao bewèrkde mèt bieveurbeeld sjtekker en metser. 't Óntsjtoonsproces van 't kunswerk waor daobie van groat belang, wie bie alle kunstenaersj oet de action painting. Vanwege zien meneer van wèrke kreeg hae de bienaam "Jack the Dripper".

Pollocks werke van nao 1951 zint duusterder van kleur; dèks gebruukde hae allein zjwart. Ouch begoes hae weer figuratief elemente in zie werk te gebruke. D'r waor väöl vraog nao zien werk, meh de druk hievan maakde dat hae ummer miè alcohol góng drinke.

Pollock sjtorf nao ein auto-óngelök in 1956.

Externe link[bewirk | brontekst bewerken]

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Jackson_Pollock&oldid=349315"