Holle waeg

Van Wikipedia
Gank nao: navigatie, zeuke

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.


Holle waeg in Ulesjtraote.

'ne Holle waeg ies 'n combinatie van 'ne waterluip of raegebaek en 'ne waeg, in 't heuvelland van o.a. Limburg. 't Ies ein, vanwege jaorelank nao ónder sjtruimend rege- en doajwater, oetgesjlete gröb. Door 't waegdèk loupe daodoor depe geule en euveral liegke kiezelsjtein en knabbe. 't Fiener materiaal, wie plante en drek weurt mètgesjlèp riechting 'n beek of rivier. 't Reparere en opvölle van vore, gemaak door paerd en karre, weurt waeg botte geneump. Um de waeg nog beter begaonbaar te make en te houte kriege diet soort waeg sóms 'n dèklaog van kiezelsjtein of 'n läögske graove asfalt. De kiezel woort gehaold oet de gemeintelike kiezelkoel. 'ne Holle waeg dae neet verhard ies sjliet óngevaer eine maeter per ièw oet.

Biotoop[bewirk | brontekst bewerken]

In de helling aan weerskent, ouch de graaf geneump, greuje, vanwege 't microklimaat van zoane holle waeg (beveurbeeld in 't ope veld) neve allerlei sjtruuk ouch versjillende wil blome die van wermde houte, zoa wie Hazegerf (Duizendblad, Achillea millefolium), Dónderkroed (Sint Janskruid, Hypericum perforatum), Dónderbloom (Wilde Marjolein, Origanum vulgare), Aels (Artimisia), Knoupkroed (Centauria pratensis), Rapunzelklökske (Campanula rapunculus), Boterbloom (Ranunculus auricomus), Agrimonie (Agrimonia eupatoria) en Hazekliè (Klaverzuring, Oxalis acetossella). Aan de sjièmkant en in hol waeg in de bösj greuje allerlei sjtruuk, wie Sjlièkrekele (Sleedoorn), Meideun (Crataegus oxyacantha), Wie (Salix), Brièmsjtroek (mèt bromele) (Rubus fruticosus), Hónsroas (Rosa canina), diverse soorte varens, graassoorte, wintergreun (Klimop, Hedera Helix) en o.a. de Gevlekde Aronskelk (Arum maculatum), Look-zonder-look en Salomonszegel. Sóms ies d'r 'ne mieddeberm mèt graas en Waegtrae (Weegbree, Plantago major).
Versjillende dere make hole in de hellinge wie knien, dasse en muus. Sóms ouch de korewouf. 't Gleujwörmke (Glimworm of Vuurvlieg, Phosphaenus hemipterus) lièt ziech sjnachs dèks zeen es 't zien leech oetsjtraolt en ouch de Karkol (Wijngaardslak) veult ziech hie thoes.

Commons
In de categorie Sunken lanes van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Holle_waeg&oldid=353182"