Elvis Presley

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Elvis Presly in 1957.

Elvis Aaron Presley (Tupelo (Mississippi), 8 januari 1935 - Memphis (Tennessee), 16 augustus 1977) waas 'nen Amerikaanse zenger en aktäör. Hae is weltwied bekèndj óngere bienaam The King of Rock and Roll, of kórteweg The King. Elvis góldj es ein vanne succesvólste en populairste soloartieste van aldertieje.

Elvis is de bès verkóchdje soloarties van aldertieje. Tiejes zie laeve verkóch t'r biejein zoea 500 miljoen plate. Daomit waas t'r de bès verkoupendjen arties tiejes zie muzikaal laeve. Inne waek nao zien doead kome nag 8 miljoen verkuipe d'rbie. Inmiddels waere zien totaal verkuipe gesjat op 1,6 miljard plate weltwied. Elvis waas tiejes zien karriaer ouch ein vanne vermeugendjste luuj inne VS.

Elvis óngersjèdje zich van zien tiedgenoeate door zien destieds controversieel, heupsjoenkelendje optraejes, de combinatie van blank uterlik en 't zinge mit 'n zwarte stum. Ouch zien uterlik vool op: zien veur daen tied lank haor, de bakkebaerden en later de jumpsuits. Zienen opzwependje stiel veróntrösdje de gevèstigdje, naokriegsje maotsjappie, wodoor d'r hieël väöl kritiek te verdure kreeg. Veur zie muzikaal pioneerswirk woort t'r gäöndjewaeg en veural nao zien doead in ummer breiere krink geieërdj. Inmiddels wuuertj Presley erkèndj es eine vanne gróndjlègkers vanne hujige popmeziek, same mit ónger angere The Beatles en Bob Dylan. John Lennon van The Beatles ómsjreef 't es völg: Before Elvis there was nothing.

Elvis wuuertj same mit Bill Haley en Alan Freed geraekendj toet ein vanne luuj die 'n wichtige rol gespeeldj höbben inne doorbraak vanne rockabilly en daomit rock-'n-roll. Elvis óntwikkeldje zich rasj es arties. Ze begósten es e trio same mit Scotty Moore (lektrikgitaar) en Bill Black (bas), mer in e jaor tied sjoof d'n drummer D.J. Fontana aan. Nag ummer is dit de gróndjbezètting van rockbands: zenger/gitaris, lektrikgitaris, bassis en drummer.

Väöl artiesten höbbe verklaordj te zeen geïnspireerdj veur 'n eige karriaer inne meziek te beginne door Elvis. Bruce Springsteen zag oeatj: There have been a lotta tough guys. There have been pretenders. And there have been contenders. But there is only one king.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Elvis_Presley&oldid=433971"