Bob Dylan

Van Wikipedia
Gank nao: navigatie, zeuke
Wikipedia:Sjterartikel

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Bob Dylan (midde) op e concèr in Stockholm

Bob Dylan (geboren es Robert Allan Zimmerman, 24 mei 1941, Duluth, Minnesota) is 'nen Amerikaanse zenger vaan eigegecomponeerde folk- en folkrockleedsjes. Heer begeleit zien eige op de gitaar, moondharmonica en soms op piano. Es proteszenger woort heer in de jaore zesteg 'n idool veur alle linkse jóngere. Zien verdeenste ligk in 't feit tot heer literair tekste in de popmuziek introduceerde; heidoor weurt heer dèks es de groetsten teksdiechter in de popmuziek gezeen.

Biografie[bewirk | brontekst bewerken]

Jäög[bewirk | brontekst bewerken]

Bob Dylan woort gebaore es keend vaan Abraham Zimmerman en Beatrice Stone, vaan Russisch-Joedsen aofkoms. Z'ne pa wèrkde es chef bij Standard Oil, meh wie heer in 1946 polio kraog verloor heer die functie en mós 't gezin verhuize veur nui werk te zeuke. Es keend en puber hoort Robert op de radio zoewel rock 'n roll es blues en country 'n western. Daoneve waor heer al vreug geïntrèsseerd in literatuur. Zien awwers bevorderde 't muzikaol talent en lete häöm piano speule.

Op de middelbaor sjaol vörmde heer mèt e paar andere de fiesband The Jokers, die ziech later The Golden Chords neumde. Ind jaore viefteg naom heer 't pseudoniem Bob Dylan aon, es ierbetuin aon d'n diechter Dylan Thomas (allewel tot heer dat zelf jaorelaank oontkind heet). In 't naojaor vaan 1959 góng heer nao de Universiteit vaan Minnesota, woe heer lèttere es riechting koos mèt es hoofvak muziek. Dao lierden 'r oonder mie 't werk vaan Woody Guthrie, dee häöm sterk beïnvleujde, kinne.

Bob Dylan es folkzenger[bewirk | brontekst bewerken]

In 't begin vaan 1961 kaom heer in Greenwich Village (New York) terech, woe heer zien groete leefde Suze Rotolo lierde kinne. Zie introduceerden 'm zoewel in 't links gedachtegood es in 't werk vaan Franse sjrievers wie Rimbaud, Verlaine en Baudelaire. In dit links-artistiek miljeu kraog heer väöl succes mèt zien protesleedsjes, veurnaomelek covers vaan Woody Guthrie, dee heer dao ouch in d'n hospitaol opzoch. In 1962 had heer al zoeväöl succes tot heer zien ierste album oetbrach, Bob Dylan geneump. In datzelfde jaor veranderden 'r bij de börgerleke stand officieel ziene naom in Robert Dylan.

De groete doorbraok kaom in 't volgend jaor, wie heer in 't veurprogram vaan Joan Baez mètreisde op tournee door de Vereinegde Staote, mèt wee heer later ouch 'n leefdesrelatie begós. Baez waor op dat momint al bekind in 't gans land en trok väöl publiek. Zoe lierde häör publiek inins ouch Bob Dylan kinne. Heer braok dat jaor door mèt Blowin' in the wind, wat 't liefleed vaan de protesbeweginge oet de jaore zesteg zouw weure, wie e jaor later The times they are a-changin' 't "volksleed" vaan alles wat joonk en links waor woort. Heer späölde oetsletend leedsjes boe-in heer soleerde en ziechzelf op de akoestische gitaar en mèt de moondharmonica begeleide.

D'n euverstap nao d'n èllentrik[bewirk | brontekst bewerken]

In 1965 waagde Bob Dylan ziech veur 't iers aon de èllentrikke gitaar, en verzamelden 'r e gezèlsjap musici um ziech eweg, die later es The Band bekind zouwe weure. Heer debuteerde mèt dees bezètting op 't Newport Folk Festival, wat veurnaomelek puristische volksmuziekleefhöbbers es publiek had, en zien optrejje sloog in wie 'n bom. Väöl vaan zien aw fans kierde ziech vaan häöm aof. Bekinde leedsjes oet 't begin vaan zien èllentrikke periood zien Subterrenean homesick blues en Like a rolling stone. Me rekent allebei de leedsjes, die oontstande zien oet ellelang litterair "oetbarstinge", oerspunkelek gedeiltelek in proza, tot de meis geïnspireerde vaan Dylan.

De muziek oet dees periood weurt dèkser es folkrock beneump; feitelek deit me daomèt de muziek tekort, umtot 't um goje, gecompliceerde muziek geit, dee me in de hitparaad nog neet gehuurd had. De LP Like a rolling stone en häör directe opvolgers weure allewijl gerekend oonder de invloodriekste oet de historie vaan de popmuziek.

Nao de bleujtied[bewirk | brontekst bewerken]

Nao zien houwelek in 1965 en e motor-oongelök in 1966 trok Dylan ziech trök oet 't openbaar leve. Mèt zien vrouw Sara Lowndes (gesjeie 1977) kraog heer ouch kinder, daobij naom zie 'n dochter oet 'n ieder houwelek mèt. In deen tied maakde Dylan en The Band mie country-echtege muziek, of beter countryrock. In 1978 bekierden 'r ziech obbins tot 't christendom, wat e groet deil vaan zie publiek neet kós appréciëre. In de jaore tacheteg maakde heer oonverminderd väöl muziek, meh de waardering vaan de critici waor maoteg. Ouch vergrijsde zie publiek ummer wijer. Heer dook nog wel op op Live Aid in 1985 en vörmde in 1988 mèt oonder andere ex-Beatle George Harrison de groop Traveling Wilburies. Op veurspraok vaan Bruce Springsteen woort heer opgenómme in de Rock and Roll Hall of Fame.

In de jaore negeteg en nul maakde heer 'ne besjeie comeback. Heer tourde väöl en mierdere bootlegs woorte oetgebrach, die allemaol good verkochte. Ouch waore de critici tevreie euver zien album Love and theft.

Discografie[bewirk | brontekst bewerken]

Regulier albums[bewirk | brontekst bewerken]

  • Bob Dylan, 1962
  • The freewheelin' Bob Dylan, 1963
  • The times they are a-changin', 1964
  • Another side of Bob Dylan, 1964
  • Bringing it all back home, 1965
  • Highway 61 revisited, 1965
  • Blonde on Blonde, 1966
  • John Wesley Harding, 1967
  • Nashville skyline, 1969
  • Self portrait, 1970
  • New morning, 1971
  • Pat Garrett and Billy the Kid, 1973
  • Dylan, 1973
  • Planet waves, 1974
  • Blood on the tracks, 1975
  • The basement tapes, 1975
  • Desire, 1976
  • Hard rain, 1976
  • Street legal, 1978
  • Slow train coming, 1979
  • Saved, 1980
  • Shot of love, 1981
  • Fidelis, 1982
  • Empire burlesque, 1985
  • Biograph, 1985
  • Knocked out loaded, 1986
  • Down in the groove, 1988
  • Oh mercy, 1989
  • Under the red sky, 1990
  • Good as I been to you, 1992
  • World gone wrong, 1993
  • Time out of mind, 1997
  • Love and theft, 2001
  • Modern Times, 2006

Regulier liverezjistraties[bewirk | brontekst bewerken]

  • Before the flood, 1974
  • Live at Budokan, 1979
  • Real live, 1984
  • Dylan and the Dead, 1988 (mèt Grateful Dead)
  • The 30th anniversary concert celebration, 1993
  • MTV Unplugged, 1995
  • Live at the Gaslight 1962, 2005

Compilaties[bewirk | brontekst bewerken]

  • Greatest hits, 1967
  • Greatest hits vol. 2, 1971
  • Greatest hits vol. 3, 1994
  • The best of, 1997
  • Live 1968-1998, 1998
  • The essential, 2000
  • Live 1975-, 2002

Legaal bootlegs[bewirk | brontekst bewerken]

  • Vols. 1-3: Rare And Unreleased, 1961-1991, 1991
  • Vol. 4: Live 1966, The "Royal Albert Hall" Concert, 1998
  • Vol. 5: Live 1975, The Rolling Thunder Revue, 2002
  • Vol. 6: Live 1964, Concert at Philharmonic Hall, 2004
  • Vol. 7: No Direction Home: The Soundtrack, 2005

Belangriekste hitsingles[bewirk | brontekst bewerken]

  • Blowin' in the wind
  • The times they are a-changin'
  • Mr. Tambourine man
  • Like a rolling stone
  • Subterranean homesick blues
  • Just like a woman
  • Rainy day women nos. 12 & 35
  • I want you
  • Wigwam
  • George Jackson
  • Knockin' on heaven's door
  • Tangled up in blue
  • Hurricane

Extern links[bewirk | brontekst bewerken]

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Bob_Dylan&oldid=349016"