Carola Schouten

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Cornelia Johanna (Carola) Schouten (Den Bosch, 6 oktober 1977) is 'n Nederlands politicus. Sinds 10 oktober 2024 is ze börgemeister vaan Rotterdam.

Ze waor vicepremier en minister in 't Kabbinèt-Rutte IV en minister vaan Laandbouw, Netuur en Veujselkwaliteit vaan 't Kabbinèt-Rutte III, zoe-ouch eine vaan de drei vicepremiers vaan dat Nederlands kabbinèt. Ze is lid vaan de ChristenUnie, 'n partij die same mèt de SGP tot de Nederlandse delegatie vaan de Europese Conservatieve en Hervörmers behuurt (daotot behure ouch de Duitse AfD en Belzje N-VA, die evels e stök rechser en Eurosceptischer zien es de ChristenUnie).

Vaan 2011 bis 2017 waor Schouten e lid vaan de Twiede Kamer. Ze waor al verkeesbaar bij de Kamerverkiezinge vaan 2010 op de zèsde plaots vaan de partijlies mer de ChristenUnie kraog meh vief zedele. Wie partijleier André Rouvoet evels 't parlemint verleet, kaom d'r 'n plaots vrij veur Schouten. In de carrière es kamerlid maakde ze häörzelf bekind es 'n groet veurstandster vaan 't kwietsjelle vaan Griekse sjölde tiejes de Eurocrisis en häör naodrök op 't verbetere vaan hoeger oonderwies in Nederland. Ze woort door de parlemintaire peers oetgerope tot polletiek talènt vaan 't jaor 2011. Same mèt partijleier Arie Slob waor Schouten oonderhandelaarster naomes ChristenUnie in 't Lenteakkoord vaan 2012. Ouch waor zie de einsegse vrouweleke oonderhanderlaarster in die formatie.

Wie de ChristenUnie in 2017 in 'n coalitie góng mèt D66, CDA en geleid door VVD (rizzelterende in Kabbinèt-Rutte III) woort Schouten twie poste aongeweze. Ze naom 't vicepremiersjap deils euver vaan PvdA'er Lodewijk Asscher (dat deej ze same mèt CDA'er De Jonge en D66'er Ollongren) en ze naom 't ministersjap vaan Laandbouw, Netuur en Veujselkwaliteit euver vaan VVD'er Henk Kamp dee euver dees oonderwerpe góng oonder de portefeuille Ikkenomische Zake.

Es minister vaan Laandbouw, Netuur en Veujselkwaliteit heet Carola Schouten veural väöl aondach gekrege veur häör beleid contra corruptie in de Nederlandse laandbouw, met naom roontelum mèsfraude, wat d'r zelfs bis heet geleid tot boere väöl vaan hun autonomie gaon kwietrake oonder häör ministersjap. Ouch kreeg zie väöl media-aondach wie 't Europees Parlemènt veur 'n embergo op pulsvisserij stömde in jannewarie 2018. In de Nederlandse visindustrie weurt väöl gebruuk gemaak vaan dees techniek.

Brónne

Nederlandstaolege versie vaan dit Wikipedia-artikel
"Minister van Landbouw, Carola Schouten, over de mestfraude" - Umroop Braobant, YouTube
"Jinek - Carola Schouten over haar eerste drie maanden als minister van Landbouw" - TV-show Jinek, YouTube

Externe link

Drs. C.J. (Carola) Schouten, Parlement.com