Roaj Baek (Roer)
Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.
De Roaj Baek of Rode Beek is 'n klein baek die óntsjprink in Duutsjlandj ten oaste van 't dörpke Arsbeck, ter hoagte van Dalheim en bie Vlodrop in de Roer oetmóndj. Ze löp door Duutsjlandj mèt 't lètste sjtök door Nederland. Óngerwaeg nao Nederland deit de baek ’t plaetske Rothenbach aan wo de baek in feite ziene (Duutsje) naam te danke haet en de Nederlandse naam van is aafgeleid. In Nederland löp ze ouch door 't Nationaal Park De Meinweg en in Duutsjlandj door 't aangrenzende Maas-Schwalm-Nette Naturpark.
In Nederland haet dees baek tweë watermeules die gebruuk make van 't baekwater. Dit zint:
- De Gitsjtappermeule
- De Vlodroppermeule (vlakbiej de móndjing in de Roer)
In zoawaal Nederland es Duutsjlandj zint dr meërdere baeke mèt de naam Roaj Baek (of Ro(o)de Beek), zoa-es biejveurbeeld de Roaj Baek, die óntsprink op de Brunssemerheij en oetmóndj in de Gelaenbaek.