Óffebek

Dit artikel is gesjreve (of begós) in 't Ruivers. Laes hie wie v'r mit de versjillende saorte Limburgs ómgaon.

---

Óffebek (Nederlands: Offenbeek) is ein van de drie woeënkerne van de gemeinte Bezel. 't Is 't gedaelte van Ruiver ten oeëste van 't sjpaor, det in 1955 op intiatief van pesjtoeër Jules Ceijssens als rectoraat waerde aafgesjeije vanne Ruiverse Lambertusparochie. De Fatimakerk, begós in 1963, waerde ein jaor later ingewied door bissjop monsinjeur Moors. Óffebek waerde in 1974 verhaeve tot zelfsjtenjige parochie. 't Dörp wurd aevegood meistal biej de Ruiver geraekend, auch al is 't min of mieër 'n dörp op zich, met 'n eige kerk en mertplein en zelfs de meiste inwoeëners van de ganse gemeinte.

Óffebek wurd al in 1288 geneumd in de persoeën van ridder Gerardus van Offenbeke, in 1294 vermeld als rentmeister van Venlo. De plaatsnaam wurd in 1382 gesjreve as Óffebec, wat al aangeuf det de oeutgank van 't waord nieks te make haet met 'n baek. Op 't inj van de 14e ieëw loge in Óffebek al 'n paar groeëte boerderieje, zoeas de Klaoshaof en de Ungerste Haof of Nederhoeve. Veur de res loge d'r get huus naeve de Keulsewaeg, ein van de aaj routes tösse Antwerpe en Kölle. 't Sjtök wat toen Óffebek waerde geneumd waar tot in de 17e ieëw nog vul gróter den tegenwoordig en reikde toet aan de Maas. Auch wat noe Ruiver hèt, waerde nog toet Óffebek geraekend.

In de 18e ieëw besjtóng Óffebek nog sjteeds oet neet väöl mieër den 'ne hampel huuskes róndj 'n saort mert. Maar taege 't inj van de 19e ieëw greujde 't gehuch inens flink met de opkoms van de klei- en gresware-indusjtrie. Dees waar hiej óntsjtange doordet de klei gemekkelik van de Pruusse Bos met de tuf euver 't gleis nao de fabrieke kós waere gebrach om daonao met 't in 1865 aangelag spjaor wiejer te waere getransporteerd. De niej fabrieke trokke vuuël volk oet anger sjtökke Limburg, woedoor Óffebek in korte tied 'n vul gevarieerder bevolkingssamesjtelling kreeg den de res van de gemeinte. Veural nao de Oeërlog noom 't belang van de kleiindusjtrie sjnel aaf, auch door de opkoms van angere bedrieve. De kleifabrieke en kemiene waerde gesjloop en allein ein klein sjtumpke herinnert aan 't gepoejak in de Óffebekse klei.