Neël-bie-As

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Assers, es te dit dialek sjpriks.

---

De Sinterklaos-vaan-Tolentijnkèrk in Neël-bie-As.

Neël-bie-As (Nederlands Niel-bij-As) is e dörp in de Belsj-Limbörgse gemeinte As. Tot 1971 waor 't 'n gemeinte op ziech. 't Dörp had in 2020 2.562 inwoeners. 't Ligk noordoostelek vaan As aon d'n doorgaonde weeg.

Etymologie

De naom Neel kump op mie plaotse in de wij umgeving veur (vergeliek beveurbeeld Neel aon de Maos, bij Remund). 't Toponiem beteikent zoeväöl 'liegte'. Alternatief is 't verklaord oet 't Gallisch nigella 'zwart'; 't zouw daan mote goon um 'ne beek mèt doonker water.

Historie

Neël veel iewelaank oonder Dilse, wat hei kortbij in oosteleke riechting ligk. 't Weurt veur 't iers geneump in 'n akte oet 1253 boe-in Dilse, mèt Neël, in lien weurt gegeve aon de graof vaan Loeën. Iewelaank waor 't 'n oonaonzienelek gehuch; pas in 1721 woort 't 'n eige parochie. In 1971 woort de gemeinte opgeluf en bij As geveug.

Neël-bie-As woort lendelek bekind es woenplaots vaan 'Broeder Bonifacius', dee es heremiet in de Lourdesgrot góng woene, en vaan de reactionaire preester Karel Van Isacker, dee hei e boeresjop umbouwde tot 'n kèrk boe heer daogeleks de mès nao d'n Tridentijnse ritus deeg.

Aonzien

Door zien late oontwikkeling heet Neël wieneg aw gebouwe. Aon de Schansbrookstraot zien nog restante vaan 'ne sjans oet 1636 te zien. 't Gief diverse boerderije oet de negentienden iew, zoewie de Joesepkepèl oet 1865. De dörpskèrk, gewijd aon Sinterklaos vaan Tolentijn, is modernistisch en woort in 1969 gewijd. Ouch gief 't nog 'n Lourdesgrot oet 1944.

Bron

Dit artikel baseert ziech op 't corresponderend Nederlandstaoleg artikel.