Maog (starebeeld)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Kaart vaan starebeeld Maog

Maog (Virgo, aofgekort Vir) is e starebeeld aon d'n hiemelequator. D'n ecliptica löp door dit starebeeld, en daomèt is Maog dus ouch ein vaan de teikene vaan de dierereem. De zon staat in dit starebeeld vaan 16 september tot 31 oktober.

Stare

(in volgorde vaan aofnummende helderheid)

• Spica (α, alpha Virginis)
• Vindemiatrix (ε, epsilon Virginis)
• Heze (ζ, zeta Virginis)
• Auva (δ, delta Virginis)
• Zavijah (β, beta Virginis)
• Porrima (γ, gamma Virginis)
• Rijl al Awwa (μ, mu Virginis)
• Zaniah (η, eta Virginis)
• Syrma (ι, iota Virginis)
• 70 Virginis is ein vaan de ierste (1996) zonechtege stare boebij 'n exoplaneet oontdèk woort. Volges sommege is 't woersjijneleker tot 't hei um 'ne brojnen dwerg geit.

Wienie 't bèste te zien?

Maog is nao Waterslang 't groetste starebeeld, meh umtot boete Spica de stare neet zoe helder zien, is 't slech te vinde. De bèste periood is aprèl tot juni, in 't bezunder eind mei roond 9 oor 's aovends.

Wat gief 't nog mie te zien?

In 't noordelek deil vaan 't starebeeld zien väöl extragalactische clusters te zien, zoewie 't Virgocluster op oongeveer 54 mieljoen leechjaor aofstand. 't Gief versjeie Messierobjekte, wie M49 (elliptisch starestèlsel), M58 (spiraolvörmeg starestèlsel), M59 (elliptisch starestèlsel), M60 (elliptisch starestèlsel), M61 (spiraolvörmeg starestèlsel), M84 (lensvörmeg starestèlsel), M86 (lensvörmeg starestèlsel), M87 (elliptisch starestèlsel en 'n bereumpde radiobron), M89 (elliptisch starestèlsel) en M90 (spiraolvörmeg starestèlsel). Neet tot 't Virgocluster behurend is M104, de Sombreronevel. In 't starebeeld vins te ouch de quasar 3C 273, de allerierste quasar oets oontdèk.

Vaan 7 tot 18 aprèl liek de meteoorzwerm de Virginide oet dit starebeeld te koume.