Krim (sjiereiland)
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
De Krim (Krim-Tataasj: Къырым, Qırım; Oekraïenisj: Крим, Krym; Róssisj: Крым, Krym) is e sjiereiland i g'n Sjwatte Zieë. 't Sjiereiland ligk ten zude va g'ne Oekraïense oblas Cherson en is mit 't vastelank verbónge via d'r Istmus va Perekop. Ten oeëste ligk de Zieë van Azov, die via 'n sjmaal zieësjtroat verbónge is mit de Sjwatte Zieë. De óppervlakde is 27.000 km². Doamit is 't get klinger wie 't Belsj. 't Aatal iwuënesj bedruëg ruum 2,3 mieljoën.[1] De groeëtste sjtad is Sebastopol.
De Krim dook al vreug óp in brónne va Greekse zieëlüj. Wie ze 't koloniseerde, woar 't eilank al durch de Tauri en Cimmeriësj bewoeënd. Sjpieëder sjtóng de Krim ónger herrsjappie van ónger mieë de Romeine, Gote, Byzantiene, Mongole, Tatare en Ottomane. In 1783 woeëd 't sjiereiland geannexeerd durch Roesland. Noa d'r val va de Sovjet-Unie in 1991 veel de Krim ónger Oekraïens gezag. In fibberwaar 2014 annexeerde Roesland 't gebeed en seërdien weëd 't betwis, wiewaal de mieëtste VN-lidsjtate de annexatie neet erkenne.
