Jehovagetuige

Van Wikipedia
(Doorverweze van Jehova's getuiges)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.



Keuninkriekszaol aon de Peymeistersdreef in Mestreech. Keuninkriekszaole zien, in vergelieking mèt kèrke vaan 't regulier christendom, dèks extreem sober vörmgegeve.

De Jehovagetuige, officieel 't Wachtoriegenoetsjap en in de volksmoond kort-eweg Jehova's, zien e min of mie sectarisch christelek genoetsjap wat euver 't groetste deil vaan de wereld is verspreid. Hun lierstèllinge zien nontrinitair (ze wieze de H. Drei-Einheid aof), chiliastisch (ze gluive in 't Doezendjaoreg Riek wat Zjezeke zal stiechte) en restorationistisch (ze griepe sterk trök op de begintied vaan 't christendóm). Ouch zien ze 'n indtiedbeweging: ze verwachte tot Zjezeke snel trök op Eerd zal koume. Op groond vaan hun nontrinitair lier gebruke ze (wienie in de eige taol besjikbaar) hun eige biebelvertaolinge. In sommege oppervlekkege opziechte vertuine ze euvereinkomste mèt 't protestantisme, al versjèlt hun lier dao sterk vaan. In tegestèlling tot de mieste protestantse kèrke zien ze evels hiërarchisch georganiseerd: op 't hoofkerteer in Warwick (staot New York) weurt de lier veur alle leie veurgesjreve.

De Jehovagetuige zien voortgekoume oet de Bible Students Movement die d'n Amerikaon Charles Taze Russell ind jaore 1870 stiechde. Hunne naom, dee ziech baseert op Isaias 43:10-12, naome ze in 1931 aon. Bij 't groet publiek zien ze bekind gewore door hun evangelisatie aon de deur, boebij ze mèt neet-geluivege in discussie goon en hun literatuur verspreie. In Nederland woene zoe'n 30.000 Jehovagetuige, op 't Belsj zoe'n 25.000.

De geluifsgemeinsjap is bij herholing negatief in 't nuits gewees door 't touwdèkke vaan seksueel misbruuk en 't collectief oetslete vaan aofvallege, wat door de kèrk vaan bovenaof weurt opgelag.[1]

Rifferenties[bewirk | brón bewèrke]

  1. NPO Radio 1 - Jehovah’s Getuigen onder de loep vanwege structuele uitsluiting ex-leden

Extern links[bewirk | brón bewèrke]


  Dit artikel is e sjtumpke. De kans Wikipedia helpe door 't aan te völle

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Jehovagetuige&oldid=451235"