Illyriërs
Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.
De Illyriërs zint 'n historisch Indo-Europees vouk det 't wèste van de Balkan bewoandje. Ze kaldjen 't Illyrisch. De sreek die ze bewoandje wuèrtj ouch waal Illyrië geneump.
De Dalmatische Illyriërs vestigdje zich in de brónstied in dit gebied; de Venetische Illyriërs in 't gebied rónjelóm 't hujig Venetië. In de gebiede t'n naorde van de Sava mingdje de Illyriërs zich mit de Kelte en in Thracië nome sommige Illyrische stamme de plaatsjelike gewuèntes euver.
De Illyriërs kwièkdje gewasse en verhanjeldje viè, paerd en produkte vervaerdig oet plaatsjelik gewónne kaoper en iezer. 't Laeve van de Illyriërs woort bepaoldj door krieg en Illyrische pirate woren 'n waor plaog op de Adriatische Ziè. 'ne Raod van eljere koos de leiers oet die veuraan stinge van de taalrieke Illyrische stamme.
Sómtieds wólle zölche stamhoufdje häör mach laote gelle euver anger stamme en stifdje klein keuninkriekskes die aevel e kórt laeve ware besjaore. Sómtieds migreerdje Illyrische stamme de Adriatische Ziè euver, nao Italië, wo zich 't Japygisch gebied van de Illyriërs vörmdje.