Golf van Biskaje

Dit artikel is gesjreve (of begós) in 't Breuker. Laes hie wie v'r mit de versjillende saorte Limburgs ómgaon.

---

Kaart van de Golf van Biskaje

De Golf van Biskaje is 'ne bóch in de Atlantische Oceaan, noordelik va Sjpanje en westelik va Zuud-Frankriek en sjtrèkt zich oet va Galicië bis aan Bretagne. Dit zieëgebeed is geneumd nao de Baskische provins Biskaje. De Franse kalle va "le Golfe de Gascogne" (de Golf va Gascogne). 't Zujelik dael van de Golf, vuur de Sjpaanse kus, waert doer de Sjpanjaarde "el Mar Cantábrico" (de Cantabrische Zieë) geneumd, wiewaal aoch de benaming "Golfo de Vizcaya" besjtaet vuur de ganse Golf.

De Golf van Biskaje is beruch vuur sjlech waer en extreme golfsjlaag.

Historie

De Romeine neumde 't in de 1e ieëw v. Chr. "Sinus Cantabrorum" (Oceaan van de Cantabri). Op sómmige middelieëwse kaarte waert de Golf aa-gegaeëve es "el Mar de los Vascos" (de Baskische Zieë).

Op 22 mei 1703 waor in de Golf van Biskaje 'ne zieësjlaag. 'ne Kaopvaardievloot besjermd doer Nederlandse kreegssjepe, ónger leijing va kapitein Roemer Vlacq, kreeg te make mit 'ne Franse kreegsvloot. De Franse uëvermach waor aevel te groeët en de Nederlandse sjepe woerte tót uëvergaaf gedwónge.

Klippe aan de Baskische kus (bie Deba, Gipuzkoa)

Geografie

Daele van 't continentaal plat laope doer bis wied in d'r bóch woeëdoer d'r vrie óndeep water is op väöl plaatsje.

De Golf kint waere uëvergesjtaoëke mit de ferry tösje Bilbao en 't Ingelsje Portsmouth. D'r besjtaet 'n gooj mäögelikhaed óm tiedes d'r uëvertóch walvösje en dolfiene te zieë.

Reviere

De wichtigste reviere die oetmunge zint:

• Frankriek: Loire, Charente, Dordogne, Garonne, Adour;
• Sjpanje: Bidasoa, Nervión, Nalón.

Sjtaej

De wichtigste (have)sjtaej langs g'n kus zint:

• Frankriek: Bayonne, Bordeaux, Royan, Rochefort, La Rochelle, Les Sables-d'Olonne, Saint Nazaire (bie Nantes);
• Sjpanje: Gijón, Santander, Bilbao, Pasaia (bie San Sebastián).