GNU/Linux

Dit artikel is gesjreve (of begós) in 't Steins. Laes hie wie v'r mit de versjillende saorte Limburgs ómgaon.

---

GNU/Linux is de offesjele naam veur computerbesturingsystjaeme die gebaseerd zin op de Linuxkernel, maer denaeve veur e grwoat deil oet GNU pergramma's bestoan. Tot is veur bekans alle systjaeme die op Linux gebaseerd zin 't geval.

De Linuxkernel zelf woart deur Linus Torvalds gesjreve. Ersprunkelik hauw er ze eigelik maer allein es hobbyperjekt gedach, maer mittertied is 't oetgegruid tot ein van de meistgebroekde besturingsystjaeme oppe waelt.

't GNU-perjekt is begoos deur Richard Stallman. Anges es Torvalds hauw Stallman al venaf 't begin geperbeerd e systjaem te sjrieve tot veur grwoate en belaangrieke computers gebroek koos waere. 't GNU-perjekt, allewel ze 'n grwoat aantal vjaelgebroekde pergramma's gesjraeve höbbe, haet echter nwoats 'n richtige kernel aafgekrege.

Deur de Linuxkernel en de GNU-pergramma's same te pakke, mit noch get anger pergrammakes zewie de Linuxversie van ps(1), kries te GNU/Linux.

Veulgebroekte GNU/Linux systjaeme zin:

• Debian
• Ubuntu
• Red Hat
• Fedora
• Mandrake
• SuSE
• Gentoo
• Slackware