Twièvleugelige

Van Wikipedia
(Doorverweze van Diptera)

Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.


De twièvleugelige (Diptera) zeen 'n orde van insekte wotoe alle vlege (Brachycera) en mögke (Nematocera) behuère.

De twièvleugelige kómme werreldwied veur en waere vertaengewuèrdig door hóngerdjdoezjendje saorte die in versjillige vörm veurkómmen en ouch e breid scala aan meugelike laeveswieze höbbe. Vlegen en mögke zeen sómtieds lestig oeterein te hajen ómdet 't mögkechtige (fiengeboedje) vlegen en ouch vleegechtige (zwaorgeboedje) mögke gèf.

Al anger orde van insekte (behauve de hièl klein orde vanne Strepsiptera) höbbe nól of veer vleugele. 't Twièdje paar vleugele is bieje Diptera gemodificeerdj toet haltjers: klein, sómtieds knoetsvörmige, orgaenkes achtere vleugele die veural bieje langpoatmögke nag hieël mekkelik waornumbaar zeen. Juus wie alle insekte höbbe de twièvleugeligen aan eder bórssegment ei paar puèt, wodoor ze zès puèt höbbe.

De twièvleugelige vörmen ein vanne succesvólste orde vanne insekte: 't aantal besjreve saorte bedruèg óngevièr 160.000. Ze zeen döks hièl gooj vlegers mit 'ne kórte generaasjetied en dus 'n gans snel veurtplantjing ónger krekke ómstenjigheje. Diptera höbbe 'n vólledige gedaanteverwusseling: de larf die oet 't ei kump is döks poatloas en wormechtig; vleeglerf heite maje.

De orde vanne twièvleugelige besteit oet e groat aantaal aan femieljes.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Twièvleugelige&oldid=376326"