Belgrado

Dit artikel is gesjreve (of begós) in 't Ètsberger. Laes hie wie v'r mit de versjillende saorte Limburgs ómgaon.

Belgrado (Sèrvisj: Београд, Beograd, letterlik "Wiete Stad") is de houfstad ven Sèrvië (saer 1404). In 2002 tèldje de stad 1.670.000 inwoeaners. 't Laet ane zudelikste randj ven de Panonisje lieëgvlakdje, wo de Sava oetmóndj inne Donau.

Gesjiedenis

Venaaf de derdje ieëf veur Christus loog óp dees plaats 'n aanvenkelik Keltisje en later Romeinsje stad die dórch de Romeine Singidunum woort geneump. Hienao góng de plaats deil oetmake ven 't Byzantiensj Riek, wonao euverhieërsjing dórch de Hunne, Sarmate, Ostrogote en Avare völgdje, toet de Serve hie aankome róndj 't jaor 630. In gesjreve brónne wuuertj Belgrado in 878 geneump es 'n óngerdeil ven 't Bölgaarsj Keuninkriek, óngere naam Beligrad, det "wiet fort" of "wiette stad" beteikentj. Later woort Belgrado weier óngerdeil ven 't Byzantiensj en later 't Bölgaarsj Riek. Venaaf de Middelieëve laet de stad in 't Servisj Keuninkriek.

d'n Ieëste Servisje keuning dae uuever Belgrado regieërdje waas Dragutin (1276-1282), dae de stad in henj kreeg vennen destiedse keuning ven Hongarië.