Steins

Dit artikel is gesjreve (of begós) in 't Steins. Laes hie wie v'r mit de versjillende saorte Limburgs ómgaon.

Steins is 't Limburgs dialek wat ze kalle in Stein en ómgaeving. Karakteristiek veur 't dialek hie en ouch in ó.m. Maes, Berg aan de Maas en Wermend, is de rollende r. Dit is aevel mer relatief: nog neet zwa lang geleje leet me in bekans gans Limburg de r nog rolle (allein staej wie Mestreech en Remunj hawwe de Franse r euvergenómme) en allewiel weurt deze klank in Stein en de anger geneumde dörper ouch ummer mjea verwaarloos. Aan de Belzje kentj laef ze trouwes ónverminderd door.

Stein lik aan de weskentj van de Panninger Linie; daodoor spruk me hie de combinatie s+consonant op ze Nederlensj oet, neet es sj-; vandao Stein en neet *Sjtein. Dit is 'n euvereinkóms mit de dialekte aan den angere Maasoever, op Belzje bójem, mae ei versjil mit de meiste ómringende dialekte in Nederlendsj Limburg. Opvallend is waal, dat in Stein de cluster -rs in -s verangert: be veurbeeld: get anges veur "iets anders"; det gebeurt aevel neet in de mjeavawdscluster -ers. De Middeljeawse oe en ie klinke in 't Steins óngevjer wie in Maerse en Gäöl: wa en jè.

'ne Bekènde Steinse teks is 't vastelaovesleedje Faala (alaaf angezóm) wat in 2006 twjedde woor bie 't LVK. Hie-in weurt trouwes 'nen houp teks achtersteveure gezónge.

Externe link

Vastelaovendleedjes oet Stein