Sibiu

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Oetzich óp 't centrum.

Sibiu (Pruus: Hermannstadt, Hóngaars: Nagyszeben) is 'n aaj middelieëuwse stad in 't hert van Roemenië en teltj 154.892 inwoeaners (2002). De stad lègk in 't zuje van Transsylvanië, aan de voot van de Transsylvanische Alpe. 't Is de höidstad van 't gelieknamig distrik (judet).

Bevólking[bewirk | brón bewèrke]

In januari 1977 had Sibiu 151.137 inwoeaners. In 1992 had de stad 169.656 inwoeaners en in 't jaor 2002 had 't 154.892 inwoeaners. De Roemene zeen d'r de meerderheid mit 95%. d'r Is 'n Hóngaarse minderheid (2%) en 'n Pruse minderheid (1,6%).

Gesjiedenis[bewirk | brón bewèrke]

Sibiu waerdje in de 12djen ieëuw gestich door Pruse immigrante en is steeds ein van de belangriekste Pruse stej in 't historisch Zevebörge gebleve. De stad is taengeweurdig twieëtalig, ouchal is 't aandeil Pruse in de bevólking nao häör oettóch in de jaore '90 nag meh 1,6%, kleinder es det van de Hóngare. In 2000 kreeg Sibiu (Hermannstadt) waal veur 't ieës sins 1945 weer 'ne Pruse börgemeister, Klaus Johannis. Hae waerdje in 2004 hèrkaoze mit 88,7% van de stömme. Johannis is populair vanwaenge zien strak en degelik beleid, in e landj det väöl te kampe haet mit corruptie in de politiek. Saer 2014 waerdje Klaus Johannis prizzedent van Roemenië.

Sibiu waas same mit Luxemburg in 2007 Culturele höidstad van Europa.

Stadsbeildj[bewirk | brón bewèrke]

In 't historisch centrum waere de hoeze gesierdj mit väöl klein daakkepèlkes, de öig van Sibiu. Mer ouch de gotisch en Wieëns-barók hoeze vraoge d'n aandach van de toeriste in de binnestad van 't veurmaolig Pruse Hermannstadt. De Pruse invlood is ouch nag zichber door de aanwezigheid van de Pruus evangelische kèrk, mit 't riek ingangsportaal, 't monumentaale orgel oet 1674 en de graafstein van de zoean van Vlad Dracula.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Sibiu&oldid=454510"