Paulus (apostel)

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Paulus (Saulus of Saul) waas 'ne kristeliken apostel. Hae woort róndj 10 v.Chr. gebaoren in Tarsus (Cilicië) oet juudse eljers en stórf in Roeame, in 64 of 67. Paulus haet 't kristendóm versprèdj inne lenjer rónjelómme Middellandjse Zieë, in 't biezunjer in waat noe Törkieje en Griekelandj is.

Ziene laevesloup wuuertj besjreve in 't biebelbook Hanjelinge vanne Apostele.

Volges die brón waas Paulus aanvenkelik aktief es vervolger vanne óntlukendje geluifsgemeinsjap die nao de kruutstiging van Jezus waas óntstange. Zelf maak t'r dao in eine van zien breven ouch meljing van (Galate 1:13).

Hae bekieërdje zich doe d'r, op waeg nae Damascus veur Jezus zien volgelinge te bestrieje, e visioen kreeg worin Jezus 'm opreep zich te bekieëre.

Paulus óngernoom vervolges versjillige reize door Klein-Azië en Griekelandj veur proto-kristelike gemèndjes te stifte. Ómdet t'r mèndje det Jezus oppe aerd waas gekómme veure ganse miensheid te verlosse, raakdje d'r in kónflik mitte geluifsgemeinsjap in Jeruzalem, die gans juuds wól zeen. Kónkrieët góng 't kónflik euvere vraog of de heidene zich móste hajen ane besniejenis. Paulus reisdje same mit Barnabas nao Jeruzalem veure kwestie ane apostelen enne eldste veur te lègke. Dees biejeinkóms woort 't apostelconvent geneump. Oetènjelik woort beslaote det de heidene neet mieë verplichtinge op móste waere gelag es strik noeadwenjig waas; besniejenis dus ouch neet.

Paulus verzwónj oet bild wen d'r nao Roeame góng veur dao berech te waere.

De breve die d'r sjreef veur 't kóntak mitte door 'm gestifdje gemèndjes te óngerhaje, make deil oet van 't biebels Nuuj Testamènt.

Paulus wuuertj ouch waal de apostel vanne heidene geneump. Hae waas d'n ieësten apostel dae de boeadsjap van 't Evangelie óngere heidene versprèdje. Toet dees deens woort t'r volges 't boek Hanjelinge door God gerope.

Centraal inne breve vannen apostel Paulus steitj de genäöjboeadsjap van 't Evangelie. Dees boeadsjap maak dudelik det edere miens toet God kan kómme door geluif. Hae kreeg väöl taengestandj vanoete juudse gemeinsjap, die vónj det me ouch de aad-testamentische wètte en gewuuendje mós euvernumme. Paulus kieërdje zich hie fel taengen en verklaordje det 'ne miens allein toet God kan kómme op gróndj van geluif. 't Nejgezatj naolaeve vanne regele is neet van belang. Dit kump veural nao veur in zien breven ane Romeinen enne Galate.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Paulus_(apostel)&oldid=394701"