Paul McCartney
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Paul McCartney woort gebore in 't Walton hospitaol boe zien mam wèrkde, neet wiet vaan zien hoes in Liverpool. Wie zien mam Mary Mohin McCartney in 1956 doed ging aon kaanker, stortde Paul ziech op de rock-'n-roll. In 1957 lierde heer via 'ne gemeinschappeleke vrund John Lennon kinne, woort lid vaan John's band The Quarrymen en ging same mèt häöm, George Harrison en Ringo Starr wijer mèt The Beatles. De mieste leedsjes woorte geschreve door Paul en John.
Paul woort in 't algemein gezeen es de knapste vaan de veer Beatles en had de groetste vrouweleke aonhaank. 'r Waor evels auch 't geruch, tot heer al in 1966 doed woar. Heer trouwde es lèste vaan de veer. Heer had 'n lang relatie mèt de actrice Jane Asher veurtot heer Linda Eastman, 'n fotografe, lierde kinne. Heer trouwde mèt Linda in 1969. Same kraoge ze drei kinder: Mary, Stella en James. Linda had al 'n dochter, Heather, oet 'n ieder houwelek.
Ein vaan McCartney's bekindste composities, Yesterday, is opgenome door 'n recordaontal artieste, en steit heiveur genoteerd in 't Guinness Book of Records. Aander ballades die ouch 'n universeel aontrèkkingskrach höbbe zien o.a. Hey Jude, Let it be en The long and winding road.
Noatot de Beatles in 1970 oet-ein gónge begós Paul oonmiddellek aon 'n solocarrière en brach 't album McCartney oet mèt doa-op 't bekinde Maybe I'm Amazed. Doa noa volgde 't album Ram wat neet groet woort oontvaange. Feitelek woar dit album door ziene low-fi aonpak zienen tied wiet veuroet en allewijl weurt Ram besjouwd es ein vaan zien bèste albums. In 1971 riech Paul McCartney 'n nui band op: Wings. Oondaanks de väöle personele wisselinge woar Wings hendeg succesvol in de joare 70. De enige drei constante leje vaan Wings woare Paul McCartney, Linda McCartney en Denny Laine. Wings maakde 'n aontal succesvolle albums zoewie Band on the Run en Venus and Mars. Ouch woort 'n aontal groete hits gescoord mèt o.a. My Love, Live and Let Die, Band on the Run, Listen To What The Man Said, Silly Love Songs en With a Little Luck. In 1981 heelt Wings op.
Ouch sjreef heer nummers mèt Michael Jackson. Same maakde Jackson & McCartney The Girl Is Mine. 't Leedsje kaom op Jacksons album Thriller, en 't woord es single metein 'ne nómmer 1 hit. Later maakde de twie nog 't nummer Say, say, say boevaan later 'n succesvol remix gemaak is.
Op 11 maart 1997 ontvóng Paul de titel Sir vaan Koningin Elizabeth II.
Noatot Linda in 1998 waor gehiemeld aon boorskaanker, trouwde heer mèt Heather Mills, 'n ex-model en anti-landmijnactiviste in juni 2002. Same kraoge ze op 28 oktober 2003 'n dochter: Beatrice Milly. In mei 2006 woort bekind tot de twie besloten hadde te goon sjeie. Op 17 maart 2008 besloot de rechbaank tot McCartney 24,3 miljoen pond (30,9 miljoen euro) aon Heather Mills moos geve. Heer moos t'n behoof vaan de opvojing vaan zien kind 35.000 pond per joar geve aon Heather.