Naorderbrök (Venlo)
Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.
De Naorderbrök is 'n verkiersbrök, ten naorde van Venlo. Ze euverspant de Maas en woort in 1970 geäöpend. De brök is ónderdeil van d'n autosnelwaeg d'n A67. Get ten weste van de brök leejt 't knouppunt Zaarderheike; ten oeëste d'rvan leejt d'n aafrit nao Velde en Venlo-Naord en inkel kilomaeters oeësteliker de grens mit Pruses. In 2010 waas de verkiersintensiteit 71.500 auto's per etmaal. Dit daolde nao 57.500 in 2015 door d'n aanleg van de nujen A74 in 2012. De totaal lingte is 388 maeter, wat rilletief kórt is veur 'n Nederlandse reveerbrök.
De brök is van groeët belang veur 't verkier tösse Eindhove en Duisburg en is ein van de twieë snelwaegbrögge van Venlo. De anger is de Zujerbrök in de A73 en leejt vief kilomaeter stroumopwaarts. De iersvolgende brök stroumopwaarts is aevel de Maasbrök beej 't centrum van Venlo. De iersvolgende brök stroumaafwaarts is de Keuninginnebrök beej Wel.