Modern heidedóm

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Oonder Modern heidedóm versteit me alle religies die sinds de negentiende iew meh veural nao d'n Twiede Wereldoorlog es (of in) subcurtureel struiminge opkaome en ziech meistal gebaseerd höbbe op aw (pre-christeleke) of oetheimse religies. De maot woe-in dees religies de aw, gans in oonbruuk geraakde tradities getrouw volge versjèlt nogal; sómmege struiminge zeuke wèrkelek de pre-christeleke religies te doen herleve, andere gebruke die allein es inspiratiebrón veur e gans nui geluif. Ouch 't doel en de filosofie vaan de religies löp oeterein: 't korter bij de natuur wèlle stoon kump väöl veur, meh ouch nationalisme kin 'n rol speule. In mier vaan die gevalle is 't modern heidedóm 'n reactie op 't christedóm, en dèks ouch 'n alternatief veur 't atheïsme, agnosticisme of verwante neet-religieus filosofieë.

De meis umvangrieke poginge veur 'n aw religie nui leve in te bloze zien 't druïdisme, 'n reconstructie vaan de Keltische, veural Britse, religie. Dit woort al in 1792 gestiech door Iolo Morganwg. Grupkes die tot dees struiminge behure umvatte zeker tiendoezende, mesjiens mier es hoonderddoezend lejer. Me moot daobij neet oet 't oug verlere tot 't druïdisme 'n vrij reconstructie is; dao bestoon ouch gemeinsjappe die ziech mie natuurgetrouw opstèlle. Ouch de religie vaan de aw Germane heet versjèllende poginge tot nui-opriechting gekind. Sommege vaan die grope ligke evels in neo-nazistisch vaorwater, andere zien sterk geassocieerd mèt aggressief acties wie kèrkverbrandinge. De mierderheid vaan de lui die dees gaodsdeenste oetveure höbbe dao gein associaties mèt. Ouch de religies vaan de Klassieke Aajdheid weure wel bedreve.

De succesvolste vaan allemaol zien evels de werkelek nui religies. Veural de Wicca is veur 'n nui religie hendeg wiedverspreid en krijg nug ummer mie volgelinge. Me sjat tot euver de ganse wereld oongeveer ein miljoen lui ziech mèt zoe'n praktieke bezeghawwe. 't Mierendeil vaan de modern heidene is joonk; bovedeen euverhiers 't vrouwelek geslach, in 't bezoonder bij de Wicca-echtege struiminge.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Modern_heidedóm&oldid=344408"