Mark van Bommel

Van Wikipedia
Gank nao: navigatie, zeuke
Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Brachs, as te dit dialek sjpriks.

Mark van Bommel

Mark Peter Gertruda Andreas van Bommel (Maasbrach, 22 april 1977) is 'ne Nederlandjse ex-voetballer en international. De middevelder is veur versjillende hoag geklasseerde teams oetgekómme en sjpaelde es lèste veur PSV.

Begin van zien carrière[bewirk | brontekst bewerken]

Van Bommel begoosj zien carrière biej de plaatsjelikke club RKVV Maasbracht. Hiej woort hae gescout door Fortuna Zitterd wo hae van 1992 pès 1999 sjpeelde. In 1999 woort hae biej Fortuna weggekoch door PSV Eindhove.

PSV[bewirk | brontekst bewerken]

Van Bommel sjpeelde zös seizoene veur PSV. In zien tweëde seizoen, Van Bommel waas doe 23, woort hae aanveurder van de Eindhovenaere. Hae behaolde in dees zös seizoene veer landjstitele (1999/2000, 2000/2001, 2002/2003 en 2004/2005) en hae won in 2004/2005 de KNVB baeker.

In ziene PSV-tied maakde Van Bommel op 10 mei 2003 in de wedsjtried PSV-Excelsior (oetsjlaag 7-0) veer gole, ein perseuënlik wedsjtriedrecord. Ein angere memorabele wedsjtried veur Van Bommel waas Ajax-PSV op 20 mieërt 2005 wiej hae drie keër scoorde (oetsjlaag 0-4).

Van Bommel sjpeelde veur PSV vieftig Europese wedsjtrieje. De wedsjtried woaan Van Bommel neet gaer herinnerd wirt is de hauve finale van de Champions League, wo-in PSV oetkaom taenge AC Milan. Net veur tied leet Van Bommel 'ziene man' Massimo Ambrosini loupe en dae scoorde hiejnao, wodoor PSV de finale van de Champions League misleep. De wedsjtried eindigde in 3-1.

FC Barcelona[bewirk | brontekst bewerken]

Biej ’t begin van 't seizoen 2005 maakde Van Bommel de euversjtap nao 't Sjpaanse FC Barcelona. Hae teikende dao ein contract veur drie jaor. Biej zien vertrèk biej PSV belaofde hae dat hae - went zien gezóndjheid dat zouw toesjtaon - nao dit contract truk zouw kómme biej PSV. Biej de presentatie van Van Bommel in Camp Nou op 10 juni 2005 haet hae gekaoze veur 't rögknummer 17. Ziene zaakwaarnummer Rob Janssen vertèlde dat clubs es AC Milan en Real Madrid ouch interesse hèjje in Van Bommel, mèr dat zien keus veel op FC Barcelona.

Biej de veurbereijing van Barcelona in Denemarke verrasjde Van Bommel de Sjpaanse pers door op Èngelsje vraoge in 't Sjpaans te antjwoorde. Van Bommel goof aan dat hae ein waek lank biej 'de nónne in Vught' (Taleninstituut Regina Coeli) hèj gebivakkeerd.

Mèt Barcelona wón Van Bommel de Primera División, de Supercopa en de Champions League. In de finale van dit lètsgeneumd toernooi sjtarde Van Bommel in de basisplaatsj en woort hae nao ein oer gewisseld.

In de zomer van 2006 kaom hae truk op zien eërdere belofte en verleet hae FC Barcelona, mede doordat hae gein vaste basisplaatsj koosj aafdwinge, veur zöstieën miljoen euro en woort hae ingelief door FC Bayern München.

Bayern München[bewirk | brontekst bewerken]

Biej Bayern bewees hae waal dat hae ein vaste waarde hèj en sjtóng hae es vaste sjpeler in de basis. Mèt München wirt hae in 't seizoen 2007/2008 kampioen van de Bundesliga en wint hae de DFB-Pokal.
In april 2008 brook Van Bommel zien naas biej de Duutsje baekerfinale taenge Borussia Dortmund (2-1 wins veur Bayern München). Hae kroog eine ellebaogsjtoat van ziene direkte taengesjtander Mladen Petric. Hae weigerde ein operatie en sjpeelde zónger masker mèr mèt gebraoke naas zien wedsjtrieje.

In augustus 2008 krit Van Bommel van ziene nuje trainer Jürgen Klinsmann te heuëre dat hae de nuje aanveurder is van Bayern München. D'r woort bewaerd dat hae de eësjte neet-Duutsje aanveurder van 't team waas, 't gein neet klopde. In de jaore tachtig was Søren Lerby, gebaore in Denemarke, häöm al èns veurgegaon.

AC Milan[bewirk | brontekst bewerken]

Op 25 jannewarie 2011 woort bekènd gemaak dat van Bommel, dae biej Bayern München nog ónger contract sjtóng tot 't eindj van 't sezoen 2010-2011, per direk de euversjtap zouw make nao AC Milan.

PSV[bewirk | brontekst bewerken]


De volgende sectie van dit artikel is gesjreve in 't Mestreechs.

In 't Ieredevisiesezoen 2012/13 späölde Van Bommmel veur PSV. Nao e wisselend jaor woort de club twiede en greep ze zjus neve de KNVB-beker. Van Bommel oondersjeide ziech in dit team es eine vaan de beter speulers. Nao de lèste competitiewèdstrijd, tege FC Twente, kundegde heer aon defintief mèt profvoetbal te stoppe.[1]

Oranje[bewirk | brontekst bewerken]

Van Bommel en Oranje is gein ónverdeild succes. Hae misde 't EK in 2000 en veur 't WK van 2002 in Zuid-Korea en Japan wis Nederland zich neet te kwalificere. Biej 't EK in Portugal in 2004 waas hae geblesseerd aan ziene knee.

De eësjte keër dat Van Bommel d'r op ein groat toernooi biej waas, is op 't Waereldkampioensjap voetbal 2006 in Duutsjlandj. Nao in de kwalificatie vesjillende keëre te zeen gepasseerd, wirt Van Bommel opgenómme in de definitieve selectie veur 't toernooi. Bondscoach Marco van Basten bewaerde aevel dat volges häöm Van Bommel zien take in Oranje neet good oetvoerde. Hae sjtóng waal biej drie van de veer wedsjtrieje op dat WK in de basis mèr woort tweë keër gewisseld. Oranje reikde tot de achste finales.

Nao dat WK woort Van Bommel neet geselecteerd veur 't duel mèt Ierlandj (4-0 euverwinning veur Nederlandj). Nao dat duel woort bekènd dat Van Bommel en Ruud van Nistelrooy neet meë in de veurluipige selectie van Van Basten zouwe waere opgenómme. Op 1 oktober maakde Van Bommel dao-op bekènd dat hae neet meë veur Oranje wouw sjpele ónger bondscoach Van Basten. Dit deeg hae naodat hae waal weer door Van Basten in de selectie waas opgenómme voor de EK-kwalificatie duels taenge Bulgarije en Albanië.

Pas op 5 augustus 2008 woort hae door de opvolger van Van Basten, zien sjoanvader Bert van Marwijk, geselecteerd veur de oefeninterlandj taenge Ruslandj. In de kwalificatiewedsjtrieje veur ’t WK-2010 in Zuid-Afrika hèj hae, veur zouwied es hae neet geblesseerd waas, ein vaste plaatsj in de basis. Nederlandj plaatsjde zich mèt gemaak veur dit WK en van Bommel woort ouch door van Marwijk geselecteerd veur de eindjrunj in Zuud-Afrika. Doa zouw oetentelik de finale waere gehaold taenge Sjpanje. Nao eine enerverende wedsjtried woort Nederlandj door Sjpanje in de verlenging ein paar minute veur 't eindj geklop door ein gaol van Iniesta.

Privé[bewirk | brontekst bewerken]

Van Bommel is getrouwd mèt Andra, de dochter van bondscoach Bert van Marwijk. Ze höbbe same drie kènjer; de tweëling Renée en Thomas en Ruben.

Clubs[bewirk | brontekst bewerken]

Seizoen Club Competitie Wedsjtrieje Gole
1992/93 Fortuna Sittard Eredivisie 1 0
1993/94 Fortuna Sittard Eësjte divisie 13 0
1994/95 Fortuna Sittard Eësjte divisie 31 7
1995/96 Fortuna Sittard Eredivisie 27 0
1996/97 Fortuna Sittard Eredivisie 19 0
1997/98 Fortuna Sittard Eredivisie 31 1
1998/99 Fortuna Sittard Eredivisie 31 5
1999/00 PSV Eredivisie 33 4
2000/01 PSV Eredivisie 32 7
2001/02 PSV Eredivisie 23 4
2002/03 PSV Eredivisie 28 9
2003/04 PSV Eredivisie 23 6
2004/05 PSV Eredivisie 30 14
2005/06 FC Barcelona Primera División 24 2
2006/07 FC Bayern München Bundesliga 29 6
2007/08 FC Bayern München Bundesliga 27 2
2008/09 FC Bayern München Bundesliga 29 2
2009/2010 FC Bayern München Bundesliga 8 0
Totaal 439 71

Eërelies[bewirk | brontekst bewerken]

Fortuna Sittard

  • Kampioen Eësjte Divisie: 1995
  • Verlezend finalis KNVB Baeker: 1999

PSV

  • Kampioen van Nederlandj: 2000, 2001, 2003, 2005
  • KNVB Baeker: 2005
  • Johan Cruijff Sjaal: 2000, 2001, 2003

Barcelona

  • Champions League: 2006
  • Kampioen van Sjpanje: 2006
  • Sjpaanse Supercup: 2005,2006

FC Bayern München

  • Kampioen van Duutsjlandj: 2008
  • DFB-Pokal: 2008
  • Ligapokal: 2007

Perseuënlik

  • Talent van 't jaor: seizoen 1998/1999
  • Nederlands voetballer van 't jaor: 2001, 2005
  • Gekaoze tot ‘Sjpeler van 't seizoen’ 2006-2007 (Fans FC Bayern München)

Nederlands Èlftal[bewirk | brontekst bewerken]

  • 53 Interlands
  • 9 Gole[2]

Trivia[bewirk | brontekst bewerken]

  • Op 21 augustus 2007 haolde de televisiezender TV Limburg same mèt Van Bommel ein grap oet. 't Sjtation zóndj ein interview oet, mèt es sjtrekking dat Van Bommel de Duutsje nationaliteit góng aanvraoge. Van Bommel wouw neet meë ónger Marco van Basten in 't Nederlands voetbalèlftal sjpele. Door dees aanvraog zouw Van Bommel esnog zien interlandcarrière via 't Duutsj voetbalèlftal kènne voorzètte. Dit is in de praktiek aevel neet meugelik volges de regels van de FIFA. Wae einmaol veur ein landj eine officiële interlandj haet gesjpeeld, maog volges de waereldvoetbalbóndj neet meë oetkómme veur ein anger landj.
  • De televisiezender TV Limburg zeij te höbbe wille aantoane dat anger nuujszenders brónne zoamèr euvernumme, zónger ze te verifiëre. De grap lökde, want 't 'nuujsfeit' woort - óngecontroleerd - wiejer vertèld door ónger angere 't NOS Journaal. [3]
  • Vanwaege financiële probleme van Fortuna Zitterd organiseerde Van Bommel op 31 mei 2009 samen mèt zien vader ein benefietduel tösje Bayern München en zien aw club in sjtadion van Fortuna Zitterd. Van Bommel zelf zaot vanwaege ein blessure op de bank. Waal verrichde hae de aaftrap.

Referentie[bewirk | brontekst bewerken]

  1. PSV.nl - Mark van Bommel kondigt afscheid aan
  2. voetbalstats.nl bezocht 10 juni 2009
  3. Interview Van Bommel blijkt grap van omroep
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Mark_van_Bommel&oldid=349544"