Lectuur

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.

---

Lectuur in de ruum beteikenis verwies nao al det gelaeze kan waere. 't Is dus 'ne verzamelnaam veur beuk, stripverhaole, pamflette, tiedsjrifter en gezette. Lectuur in de sjtrikte beteikenis is de leger, populair vorm van gesjreve fictie. Dees litste definitie weurt wiejer oetgewirk in dit artikel.

Lectuur weurt gekinmerk door einvaad: sumpel verhaolliene, oppervlakkig geteikende personages, bao neet vernujend in de sjrieftechniek. In taengesjtèlling toet de karakters van de literatuur, zitte in de lectuur sjtereotype die ummer oppervlakkig bleve; ze verangere dus neet door 't verhaol haer. De bekindjste vörm van lectuur zeen sjtasieromenkes mit clichémaotige leefdesverhaole es óngerwirp (wie de doktersroman en de kesjteelroman). Lectuur sjteit dus taegeneuver de literatuur.

Lectuur weurt ouch waal aangeduud es massaliteratuur, óntsjnappings- of óntsjpanningsliteratuur, triviaalliteratuur, amusaasjeliteratuur of populair literature. Dao-ónger valle de meiste dokters-, leefdes-, sciencefiction-, wildwest- en misdaodromans, mer ouch väöl waek- en maondjblajer.