Irene van Vlijmen

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Wieërts, es te dit dialek sjpriks.

---

Drièjend ei bekleid mèt mozaïek in 't park van Chateau Sint-Gerlach

Irene van Vlijmen waor 'n kunstenares, die sjilderde, seerraoje maakde en mozaïeke samesjtèlde. Zie woort gebore in 1940 in Weert en ies in 2007 op 67-jaorige laeftied gesjtorve in Malaga (Sjpanje). Es opleiding volgde zie de Sjtadsacademie in Mestreech en de Rieksacademie veur beeldende kunste in Amsterdam. Zie woonde in Sjpanje en trouwde mèt Alfonso Fernandez Nieto, 'ne projekóntwiekelaer.

Zie ónderteikende häör werk tièntalle jaore mèt van Vlymen, umdat de lange ij internationaal lestig te verkoupe waor.

Sjtiel

De sjtiel van häör werk vèlt ónder 't abstrak expressionisme: hièl kleurriek en lyrisch van toan.

Werk

Zie sjilderde aquarelle en olieverf. Maakde mozaïeke en seerraoje en óntwórp tapijte. Exposities hou ze in o.m. Sjpanje, Amerika, Japan, Frankriek, Scandinavië en Nederland.

Werk van häör ies te vinge in:

• Chateau Sint-Gerlach in Houtem: mozaïek-fresco in de baekapel en 'n drièjende sculptuur in de vörm van 'n mèt mozaïek bekleid ei in 't park van 't kesjtièl.
• Bezinningskapel in Bourgogne
• Grand Hotel Karel V in Utrech: mozaïek en moerkleier
• Chateau de Chailly in Pouilly-en-Auxois in Frankriek: vloere, moere en plafóns bekleid mèt fresco's en mozaïeke.