Charles Eyck

Van Wikipedia
Gank nao: navigatie, zeuke

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.


Charles Ecyk
Kèrk in Meersje-Wes nao 'n óntwerp van Charles Ecyk

Charles Eyck (sóms weurt ziene achternaam ouch gesjpeld es Eijck) (24 mièrt 1897 - 2 augustus 1983) waor 'ne Limburgse sjilder en vertegewoordiger van 't expressionisme.

Biografie[bewirk | brontekst bewerken]

Eyck woort gebore in Meersje. Wie 'r 11 jaor waor, kreeg 'r roadvonk en tyfus, woadoor hae douf woort. Mèt 14 jaor góng 'r wèrke bie de aardewerkfabriek Ceramique in Mestreech.

Nao d'n Ièrsjte Waereldoorlog góng hae nao Amsterdam, woa 'r góng sjtudere aan de Rieksacademie. In 1922 wón hae de "Prix de Rome", 'ne prestigieuze kunspries. 't Geld wat bie dae pries hoort moos hae besjtae aan sjtudie van kuns in Frankriek en Italië. In Italië trof hae de Zjweedse sjilderes Karin Meyer, mèt wae 'r later zou trouwe. In 1925 woort hun dochter Anne-Margit ("Bimba") gebore. Hunne zoon Ragnar woort gebore in 1930. In de jaore 30 kreeg Eyck väöl opdrachte, ónder andere veur moersjilderinge in kèrke. Ouch waor hae aangesjlote bie 't literair tiedsjrief "De Gemeenschap" en maakde illustraties daoveur. Aan 't ing van de jaore 30 maakde hae ein paar sjtudiereize nao Portugal, Frankriek en Noord-Afrika.

In 1938 kaom hae weer in Zuud-Limburg wone, in de Ravesbösj, gemeinte Houtem-St. Gerlach, kort bie bie Sjömmert, woa hae 'n hoes mèt atelier leet boewe.

In 1948 kreeg hae de opdrach um 't kroaningssjilderie te sjildere van keuningin Juliana, die in dat jaor häör mam Wilhelmina opvolgde. In de zomer van 1962 besjilderde hae 't kèrkske in 't Noord-Frans dörpke Jeantes-la-Ville.

Wie hae in 1980 krank waor en in Mestreech in 't ziekehoos loog, besjreef en illustreerde hae dat in zie book Mijn vakantie in de witte dalen van Sint Annadal.

In 1962 woort hae óngersjeije mèt de Orde van de Gulden Humor, 'ne pries van de gezamelike Limburgse carnavalsvereiniginge. Hae waas hiemit de eësjte dae deze pries in óntvangs nóm.

Charles Eyck sjtórf op 86-jaorige laeftied in zien hoes in de Ravesbösj.

Werk[bewirk | brontekst bewerken]

Neve olieverfsjilderie, teikeninge, glaas-in-loadvènstere, keramiek en houtsjniejwerk maakde Eyck 't óntwerp van de kèrk in zien geboorteplaats Meersje-Wes. Ouch de moersjilderinge, glaas-in-loadvènstere en glaas-in-betónvènsterkes in diet geboew zint van zien hand. In 't kèrkske van Jeantes-la-Ville in Noord-Frankriek besjilderde hae de moere (200 m² mèt sjilderinge).

Externe link[bewirk | brontekst bewerken]

[1] expositie 2003 in Houthem-St. Gerlach

Brón[bewirk | brontekst bewerken]

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Charles_Eyck&oldid=359861"