Bokeh

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Veurbeeld vaan Bokeh. De blom is in focus, de veurgroond en achtergroond neet.

Bokeh (oetgesproke es "boh-kè"[1], allewel me dèks "boowkee" of "boowkuh" huurt, aofkomsteg vaan 't Japans, boke 暈け, wat "wazig" of "oonsjerp" beteikent) is 'ne fotografischen term dee 'n aonduiding is veur de weergave vaan leechbronne in 't deil vaan de foto wat neet in focus is. Dit weurt geproduceerd door 'n lens mèt 'n klein sjerptedeepte.[2] Röstege oonsjerpte kump dèks es aongenaom euver, en weurt miestal gebruuk um aofleiing te veurkoume en naodrök te lègke op 't oonderwerp.

Bokeh weurt bepaold door 't oontwerp vaan 't objectief. De vörm vaan 't diafragma späölt daobij 'n rol, mer ouch de meneer wie 'n objectief is gecorrigeerd veur sferische aberratie. 't Feit, tot 'n objectief mèt gooj achtergrondoonsjerpte-weergave slechter presteert bij oonsjerpe oonderwerpe in de veurgroond, hingk hei mèt same.

'ne Bepaolende factor veur de weergave vaan oonsjerpte is de meneer boe-op 'n punt boete 't sjerptevlak weurt weergegeve. Leech zal neet in ein punt geconcentreerd weure, mer verspreid zien euver 'n groeter oppervlak. 'n Verdeiling mèt 'n helder centrum en 'n aofnummende helderheid nao de ren touw liekent ideaal veur 'n gooi oonsjerpteweergave. Mèt zoe'n weergave vaan beeldpunte weurt 'n zach beeld es gehiel bereik.


Herkoms vaan 't woord[bewirk | brontekst bewerken]

't Woord 'boke' kump oet 't Japans, en beteikent 'oonsjerp'. De sjriefwijs 'bokeh' is in 1997 geïntroduceerd door Mike Johnston in 't tiedsjrif Photo Techniques. De 'h' veugde heer touw um de correcten oetspraak veur Ingelstaolige mekeleker te make.

Aon 't woord 'bokeh' weurt noe mie beteikenis touwgekind es allein de lètterleke beteikenis 'oonsjerpte'. 't Heet betrèkking op de kwaliteit vaan de oonsjerpte en weurt geassocieerd mèt aongenaom oonsjerpte. Veur dees nuancering zouw me in Japan 't woord 'boke-aji' gebruke.

Rifferenties[bewirk | brontekst bewerken]

  1. Podcast in 't Ingels euver d'n oetspraak vaan 't woord Bokeh
  2. Tom Ang (2002). Dictionary of Photography and Digital Imaging: The Essential Reference for the Modern Photographer. Watson–Guptill. ISBN 0817437894. 
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Bokeh&oldid=341323"