Black metal

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Black Metal is e subgenre vaan metal dat in de late jaore '80, mèt naome in Scandinavië, ontstande is. 't Is e extreem metalgenre, meh is toch wezelek aanders vaan bijveurbeeld Death metal - ouch 'n extreem genre. Black Metal is hiel breid, 't geit vaan extreem minimalistisch en ultra-snel tot enorm complex, tot zwoer depressief. Vanallles is dus meugelek binne de Black Metal. Toch is edere black metalband geboonde aon bepaolde grenze. Zoe is 't genre doordrenk vaan misantropie, en späölt atmosfeer 'n hiel belangrieke rol. Black metal kinmerk zich mèt naome door 'n agressief gitaargeluid, hoege "sjriewerige" vocaole, en dissonante akkoorde. Wie gezag späölt atmosfeer 'n hiel belangrieke rol, en Black metalbands zalle z'ch daorum vrijwel noets hawwe aon 't koeplèt-refrein sjema, in tegestèlling tot de mieste moderne meziek. De struktuur vaan Black Metal is dus vrij apaart, en is dèks progressief vaan aard. Daobij speule tekste ouch 'n vrij belangrieke rol. De tekste zien euver 't algemein vrij misantropisch vaan aard, en handele euver Satanisme, anti-christelijkheid in z'n algemein, de natuur, Europese natuurreligies, en de eige umgeving.

Historie[bewirk | brón bewèrke]

De historie vaan black metal is op te deile in drei zoegenaomde "waves" (Ingels veur "golve"). Daovaan is mèt name de twiede wave, in de vreuge jaore '90 beruch.

De ierste wave[bewirk | brón bewèrke]

In 1982 kaom Venom mèt z'n twiede album, geneump black metal. Vaan dit album daank Black Metal z'ne naom. In feite waor 't album stylistisch gezeen 'ne vörm vaan Thrash metal, meh d'r waore toch al black metal trikskes ziegbaar, wie theatrale shows, en satanistische tekste. Ouch de produktiekwaliteit waor lieg - get wat sterk trökkump in de Black Metal-wereld vaan de twiede wave. De vocaole vaan 't album waore ouch e stuk rauwer es normaal bei Thrash Metal.

'n Jaor later woort de band Bathory opgerieg. Dizze band heet e soortgeliek geluid es Venom, allein nog get rauwere vocaole, en ouch de snelheid waor in de begindaog vaan Bathory erg hoeg. Bathory waor ouch de ierste dee de tekste veurzaog mèt Noorse mythologie.

D'r zien nog get aander belangrieke bands oet de ierste wave, mèt naome Celtic Frost.

De twiede wave[bewirk | brón bewèrke]

Haafweegs de jaore '80 bleve Venom, Bathory, en Celtic Frost de einige die Black Metal maakde, meh dat veranderde toen in Noorwegen Black Metal evolueerde. In 1984 waor namelijk de band Mayhem opgerieg, oonder leiing vaan Euronymous. Dizze band waor erg ideologisch en erg serieus in hunne gedachtegaank. De in 1987 oetgebracht LP, Deathcrush waor e typisch veurbeeld vaan wat v'r noe kinne es "raw black metal"; super snel, minimalistisch en agressief. Roond deezelfde tied begóste bands es Burzum ('n mie ambientaal projek), Emperor, Immortal, Satyricon, en Darkthrone te speule ; dit zien allemaol Noorse bands. 't Waor toen al dudelek tot al dizze bands weliswaar tot 't zelfde genre huurde, mer toch 'ne gans aandere stijl späölde. Burzum - 't geistekeend vaan Varg Vikernes - is beveurbeeld erg ambientaal. Emperor zit in de chaotische hook vaan 't genre, en waor de ierste dee symfonische eleminte ging gebruke. Immortal is mèt naome bekind veur z'n utermaote hoeg snelheid. Satyricon zat mèt z'n ierste album al metein 'ne groete zat in 't sjrieve vaan middelieuwse tekste. Darkthrone is daorentege mie georiënteerd riechting Mayhem.

Dizze twiede wave is beruch umtot sommege lede vaan bovegeneumde bands allemaol erg serieus waore, en de "koedaordegheid" vaan hunne meziek neet liegveerdeg oppakte. Zoe is d'r 'ne zoegenaomde Black Metal Inner Circle opgerieg, 'n organisatie die radicaol anti-christelijk waor. 't Ierste blood dat vleujde waor Per Yngve Ohlin, bijgenaomp Dead, dee zelfmoord pleegde in 1991. In 1993 woort Euronymous vaan Mayhem vermaord door Varg Vikernes vaan Burzum. Vikernes verzörgde op dat momint de bas veur 't volledege album van Mayhem, De Mysteriis dom Sathanas. Vlak veur dee moord woorte tientalle kèrke in Noorwege door de Inner Circle in brand gestoke.

De derde wave[bewirk | brón bewèrke]

't Is oonbekind wienie de derde wave begos, meh de mieste deenke zoe roond 1997. 't Begos toen get minder te goon mèt de Noorse bands, en Black Metalbands sprónge es paddesteul oet de grond, euveral ter wereld. Oonder leiing vaan Emperor kaome d'r steeds mie symfonische eleminte in de meziek, leiend tot 't genre "symfonic black metal". Bands es Dimmu Borgir höbbe dizze stijl commercieel gebruuk. Tegewoordeg oondervind de Black Metal een twiestrijd; sommege bands weure steeds commerciëler, oonder leiding vaan Dimmu Borgir, tot woede vaan väöl Black Metal puriste. Dit heet d'r tow geleijd tot väöl nui Black Metal bands weer steeds mie tröktrègke nao de underground. Ouch Symfonic Black Metal geit trök de underground in.

Bekinde bands[bewirk | brón bewèrke]

Bekinde bands oet de Black Metal zien onder andere

D'r zien netuurlek väöl mie bands, oontèlbaar väöl, en ouch is 't e gegeve tot väöl Black Metalbands - alleweel bekind in de scene - vrij oonbekind zien, meh toch väöl meziek make.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Black_metal&oldid=369684"