Belsj Braobant

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


't Vereineg Keuninkriek vaan de Nederlen; Zuid-Braobant in 't doonkergeel.
't Loot vaan de provincie Braobant in 1995: splitsing in 'n Vlaomse provincie, 'n Waolse provincie en e Breusels deil.

Belsj Braobant (officieel Zuid-Brabant/Brabant-méridional tot 1830, en Brabant daonao) is 'n geweze provincie midde in 't huieg Belsj. Hoofstad waor de gansen tied Breusel.

De provincie woort in 1815, in 't Vereineg Keuninkriek vaan de Nederlen, gestiech oonder de naom Zuid-Braobant, en waor d'n opvolger vaan 't Frans Departemint vaan de Dijle. Neve Zuid-Braobant gaof 't ouch Noord-Braobant (hoofstad Den Bosch) zoewie de provincie Antwerpe, die 't middedeil vaan 't aajd hertogdom Braobant oetmaakde. De provincie bestoont oet drei arrondisseminte, Breusel, Leuve en Nijvel. Officieel waore de ierste twie Nederlandstaoleg en 't lèste Franstaoleg, meh zeker de stad Breusel waor toen al sterk aon 't verfranse.

Nao de aofsjeiing vaan 1830, die in 1839 door Nederland woort erkind, woort de naom verkort tot sumpel-eweg Braobant. Umtot de facto 't Frans in de negentienden iew es insegste officieel taol deende, gaof 't in 't begin gein groete probleme mèt cultuurversjèlle. Op d'n door evels begóste de Vlaominge ummer mie rechte veur hun taol op te eise en woort de tegestèlling tösse Nederlandstaolege en Franstaolege sterker. De probleme woorte nog versterk door de verfransing vaan Breusel, 'n oersprunkelek Vlaomse stad, die door immigratiedrök ouch de umligkende plaotse ummer mie deeg verfranse.

Bij de vasstèlling vaan de Taolgrens in 1963 kaom die dweers door Braobant te ligke, wat ouch nog 't (officieel) twietaoleg Breusel binne zien grenze had. Wie de gemeinsjappe en later ouch de geweste ummer mie bevoogheid kraoge, woort dees situatie oonwèrkbaar. Zeker wie 't Belsj in 1993 'ne federaole staot woort, verdeild in e Vlaoms, Waols en Breusels gewes, had de provincie wieneg beteikenis mie. In 1995 besloot me Braobant daan ouch op te splitse in 'n provincie Vlaoms-Braobant (hoofstad: Leuve), 'n provincie Waols-Braobant (hoofstad: Waver) en e Breusels deil, wat neet provinciaol is ingedeild.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Belsj_Braobant&oldid=347245"