Asfeld

Van Wikipedia
Gank nao: navigatie, zeuke

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.


Kèrk van Asfeld

Asfeld ies 'n gemeinte in 't departement Ardennes in noord-Frankriek. De gemeinte haet 'n oppervlak van 22,1 km² en 998 inweunersj (2006).

In de miedelièwe heesj Asfeld Ecry. In 1671 woort 't gekoch door graaf Jean-Jacques de Mesmes, dae 't dörp Avaux-la-Ville neumde. 't Graafsjap Avaux woort in 1728 gekoch door baron Claude-François Bidal. De plaats góng Asfeld heisje, 'n verbastering van de plaatsnaam Harsefeld in Duutsjland, woa Bidal ouch baron van waor. Hae leet 'n kesjtièl boewe (1730), dat in de Franse revolutie woort aafgebroke.

Asfeld haet 'n opmerkelike parochiekèrk. Dees kèrk, gewiejd aan Saint-Didier, dateert oet 1681-1685 en ies opgetrokke in baroksjtiel. 't Geboew woort óntworpe door de dominicaan François Romain, dae in Mestreech in 't kloaster zoot en ónder andere dao de Servaosbrök restaureerde[1], in opdrach van graaf Jean-Jacques de Mesmes. 't Baksjteine kèrkgeboew, de briegke woorte ter plaatse gebakke, haet 'ne plattegrónd in de vorm van 'n viola da gamba; d'n opdrachgever meinde dat in e geboew in de vorm van e muziekinstrument 't baeje en zinge van de geluivige beter d'n hemel zou bereike.

De kèrk besjteit oet drie deile: 'n euverdèkde zulegalerie es ingangspartie, 'ne klokketore en 'n rotonde. De kèrk weurt umgeve door 'n colonnade en haet 'n lengde van 44,82 maeter, 'ne umtrèk van 145 maeter en 'ne doorsjnee van 21.43 maeter. 't Aantal zule en pilere bedreug 138. In 't geboew liegke 5 groater en 5 kleiner kapelle, die verbonge were door 'n róndloupende gengske mèt róndbaogpeurtsjes. Op de verdeping löp 'n minigalerie en bevinge ziech tribunes De kèrk ies in 1998-2001 en 2008-2010 gerestaureerd.

Saer 2002 weurt in Asfeld 'n internationaal viola da gamba-festival gehoute.

Externe link[bewirk | brontekst bewerken]

Referentie[bewirk | brontekst bewerken]

  1. Planète TP
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Asfeld&oldid=348780"