Ares I-X

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Ares I-X
Embleem vaan Ares I-X

Ares I-X is de naom vaan de ierste tesvlöch in 't Ares I program, wat 'n oonderdeil is vaan 't Constellation program. Ares I is 'n lanceersysteem veur bemande ruimtevlöchte wat oontwikkeld weurt door de NASA. Ares I-X liekent qua uterlek, gewiech en gruutde op de geplande versie vaan Ares I, mer de binnekant is aanders. De vlöch stoont gepland veur 27 oktober 2009. De lancering woort 'ne kier oetgestèld vanwege de weerscondities. Eine kier is 't oetgestèld op T-2:39 vanwege 'n vrachsjeep wat de gevarezone binne voor. Oeteindelek is de vlöch oetgestèld tot 28 oktober. Op deen daag um 11:30 EST (16:30 Nederlandsen tied) is de Ares I-X oeteindelek gelanceerd.

Op 1 fibberwarie 2010 kondigde president Barack Obama aon tot 't Constellation program gesjrap geit weure, in verband mèt bezuiniginge.[1] Dit moot evels nog weure goodgekäörd door 't congres.

Samestèlling[bewirk | brontekst bewerken]

De rakèt besteit oet 4 trappe. D'n ierste trap is 'n zoegenaomde vastebrandstofmotor. D'n twieden trap is noe leeg, mer weurt oeteindelek oetgerös mèt 'n J-2X-motor. D'n daarden trap is ouch leeg, mer is veur instruminte bedoeld. De veerden trap bevat in dit geval 'n naomaak Orion ruimtevaartuig en 'n Launch Abort System (LAS).

Vergelieking vaan gruutdes vaan versjèllende rakètte en de Space Shuttle

Op 20 oktober 2009 is de Ares I-X rakèt vaanoet 't Vehicle Assembly Building (VAB) nao lanceerplatform 39B gerold. 't Lanceerplatform is aongepas aon de väöl groeter lengde vaan de Ares I-X: de bliksemaofleiers mote väöl hoeger zien es bij de Space Shuttle, dee hei normaal gelanceerd weurt. De Ares I-X is mèt zien oongeveer 100 meter bijnao twie kier zo groet es de Space Shuttle.

Tesvlöch[bewirk | brontekst bewerken]

Video vaan de lancering

De tesvlöch doorde 2 minute en waor bedoeld um te teste of de controleapparatuur en -software die oontwikkeld weurt veur Ares I voldeit. Daoneve wouw me teste of de sjeiing vaan de ierste en bovenste trappe good wèrk. Ouch woort de dynamica vaan de trökkier vaan d'n iersten trap in de atmosfeer oonderzeuk en de wèrking vaan de parachute. Nao 6 minute lande de draagrakèt weer aon parachutes in d'n Atlantischen Oceaan, op zoe'n 240 km vaan 't lanceerplatform. 't Bovenste deil vaan de rakèt stortde in d'n oceaan en weurt neet trökgehaold.

Landing vaan de draagrakèt[bewirk | brontekst bewerken]

De draagrakèt is bij de landing versjendeleerd geraak. De projekmanager vaan de Ares I-X tesvlöch vertèlde tot eine vaan de hoofparachutes neet good ope is gegaange, wat tot gevolg had tot 'ne twiede hoofparachute mer haaf ope ging. In plaots vaan mèt 3 hoofparachutes te lande, is de booster mer mèt oonderhave parachute geland, boedoor heer väöl helder in 't water terech kaom es veurzeen. Toch waor 't testeam optimistisch umtot de oeteindeleke booster zoe'n 15% minder zwoer zal zien.[2]

Kantele vaan de bovenste trap[bewirk | brontekst bewerken]

Daoneve gaof de projekmanager 'n verklaoring veur 't kantele vaan de bovensten trap direk nao 't sjeie vaan de trappe, wat hiel dudelek te zien waor op de video-opnames. Sjijns waor dit te verwachte, oondaanks tot d'n trap gevöld waor mèt balas. 't Zwoerdekrachmiddelpunt laog evels op 'n vreem plaots, boedoor d'n trap zoewiezoe oonstabiel waor. In d'n oeteindeleke Ares I zal evels dezen trap veurzeen zien vaan de J-2X-motor, boedoor d'n trap weer stabiel weurt. Ouch späölde mèt tot de sjeiing vaan de trappe op 'n väöl lieger huugde plaotsvoond es later bij de Ares I zal plaotsvinde.

Sjaoj aon 't lanceerplatform[bewirk | brontekst bewerken]

Zoe'n twie oor nao de lancering is 'n team begós mèt 't veileg stèlle vaan 't lanceerplatform. Daobij woorte 'n twietal leke oontdèk in touwveurlijne veur de rakètbrandstof. De leke zien zoonder probleme touw gemaak. Door de speciaal Pad Avoidance Maneuver die de rakèt maakde um te zörge tot heer neet tege 't platform bots bij de lancering, is väöl sjaoj oontstande door de hitte vaan de oetlaotgaze. Alletwie de lifte in 't platform waore kepot, zjus wie alle communicatielijne tösse 't platform en launch control. Ouch waore alle megafone gesmolte. Dees sjaoj waor evels verwach, en volgende lanceringe vaan Ares I zouwe vaan 'n 'gezuverd' platform plaotsvinde.

De volgende tesvlöch is Ares I-Y, die gepland steit veur miert 2014. NASA heet evels aongegeve tot dees tesvlöch meugelek gesjrap weurt, umtot de tesvlöch te laat in 't program vèlt. Aander tesvlöchte weure evels neet oetgeslote.[3] M1et 't meugelek sjrappe vaan 't Constellation program is dat evels ouch neet mie aon de orde.

Referenties[bewirk | brontekst bewerken]

  1. http://www.nasa.gov/pdf/420990main_FY_201_%20Budget_Overview_1_Feb_2010.pdf
  2. Nancy Atkinson (30 oktober 2009). "Ares I-X Manager Addresses Booster Damage, Stage Tumbling and Thrust Oscillation". [ ]
  3. "Managers reevaluating Ares I-Y flight test". 3 november 2009. [ ]
Commons
In de categorie Ares I-X van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Ares_I-X&oldid=352283"