René Magritte

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

René François Ghislain Magritte (Lesse, 21 november 1898 – Schaarbeek, 15 augustus 1967) waor 'ne surrealistische kunsteneer. Heer kin besjouwt weure es ein vaan de bekinste sjèlders vaan 't Belsj vaan de twintegsten iew.

Levesverhaol

Wie Magritte daartien is (1912) pleegde zien meer zelfmaord. Me voont häör mèt 'nen dook um häöre kop trök in de reveer de Samber. Dat heet väöl invlood gehad, op zien sjèlderije is deks iemes mèt 'nen dook um de kop te zien. Vaan 1916 bis 1921 góng Magritte nao de academie vaan Breussel. E jaor later trouwde heer mèt Georgette Berger. Zie zouw model stoon in väöl sjèlderije vaan Magritte.

In 't begin es sjèlder wèrkde heer in de stijle vaan 't kubisme en 't futurisme. Nao 1925 begós heer mèt mie surrealistische werke. In 1927 had heer zien ierste expositie in Breussel. Vaan 1927 bis 1930 verbleef heer in Paries. Tösse 1940 en 1945 woende heer in Carcassonne (Fraankriek) en góng heer euver tot 'ne mie impressionistische stijl boenao heer trök kiert tot 't surrealisme. Bij zien trökkoms in 't Belsj woort heer lid vaan de communistische partij.

Werk

't Hoes vaan René Magritte in Breussel.

Magritte stoont bekind es 'ne gewoene maan vaan 't volk. Heer woende 't groetste deil vaan zien leve in Jette bij Breussel. Heer had gein atelier en wèrkde gewoen thoes aon de keuketaofel. Ein vaan zien bekindste werke is de serie dee bekind steit es La trahison des images ('t verraod vaan de veurstèlling) of Ceci n'est pas une.... boevaan de Ceci n'est pas une pipe de bekindste is. Mèt dees sjèlderije zèt heer de kieker tot dinke aon euver wat heer zuut op e sjèlderij.