Mestreechter Taol

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Mestreechter Taol (MT) of mestreechtertaol.nl is 'n Limbörgse website en 'n oetgebreid taolkundeg naoslaagwerk euver de Mestreechse variant vaan 't Limbörgs. 't Belangriekste oonderdeil is d'n dictionair vaan de Mestreechter Taol, d'n officielen opvolger vaan de Nuie Mestreechsen Dictionair (NMD). Daoneve bevat de website grammaticahölp, spreekwäörd en gezègkdes, complete naoslaagwerke en e geavvenceerd rijmsysteem.

't Projek Mestreechter Taol is bedach, geïnitieerd en oetgewèrk door Roger Weijenberg. Zien ambitie waor um 'n taolkundeg naoslaagwerk te creëre veur 't Mestreechs (ofwel de Mestreechse variant vaan de Limbörgse spraok) wat online en gratis besjikbaar zouw zien. Binne 't projek heet heer twie bestaonde dictionairs en vijf aander taolkundege beuk gedigitaliseerd en alle gegeves binne ein database aonein gekoppeld. Door middel vaan scrips is extra data geginnereerd.

Um de online dictionair ouch te laote functionere es e rijmdictionair waor fonologische analyse nudeg vaan 't klaanksysteem vaan 't Mestreechs Limbörgs. Weijenberg heet heiveur e programma gesjreve wat de umzètting nao 't IPA - 't Internationaol Fonetisch Alfabet - otomatiseerde, boedoor 'n klein 70.000 wäörd zien veurzien vaan 'n eige IPA-transcriptie.

Op 18 november 2014 waor de website Mestreechter Taol e feit; 'n oetgebreid taolkundeg naoslaagwerk euver 't Limbörgs dialek vaan Mestreech, mèt es belangrieks oonderdeil 'nen dictionair vaan 't Mestreechs dee erkind weurt door Veldeke es d'n officiëlen opvolger vaan de Nuie Mestreechsen Dictionair. Daoneve bevat de site grammaticahölp, vervoginge en verbuiginge, spreekwäörd en gezègkdes, versjèllende beuk en e rijmsysteem. Op 26 miert 2015 kraog Weijenberg in Gent de Europese Language Industry Award oetgereik veur zien projek Mestreechter Taol.

Taolwetensjappeleke oondersteuning

Veur de taolwetensjappeleke oondersteuning en begeleiing heet Weijenberg hölp gekrege vaan prof. dr. Flor Aarts, prof. dr. Carlos Gussenhoven (Radboud Universiteit, Nimwege), prof. dr. Leonie Cornips (Meertens Instituut / Universiteit Mestreech) en prof. dr. Nicoline van der Sijs (Meertens Instituut / Radboud Universiteit).

Fincancieel steun

MT heet financieel steun gekrege vaan de Gemeinte Mestreech, Rabobank Mestreech, Raod veur 't Limburgs, Prins Bernhard Cultuurfonds Limburg, Stichting Elisabeth Strouven Kanunnik Salden, Stichting Frederik Edmond Brand, Stichting 't Struyskommitee en Stiechting Veldeke Mestreech.

Brón