Jeu Sprengers
- Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Tegels, es te dit dialek sjpriks.
Mathieu (Jeu) Sprengers (Tegele, 24 mei 1938 – 6 april 2008) waas ‘ne Nederlandse sjportbesjtuurder. Hae waas 15 jaor lank veurzitter van de KNVB en sinds 1996 lid van 't besjtuur van de UEFA.
Carrière
[bewirk | brón bewèrke]Naodat hae zien sjtudie economie aan de Universiteit van Tilburg haej aafgerundj, is hae zien carrière bie Joseph van de Loo BV in Venlo begoosj. Daonao waas hae óngevieër twintig jaor directeur van 't boewbedrief Muyres BV in Zitterd en vervolges zaot hae vanaaf ‘t jaor 2000 in de raod van besjtuur van de Van Wijnen Groep.
In 1976 woort Sprengers penningmeister bie de Venlose voetbalclub VVV-Venlo. Van 1981 tot 1990 waas hae veurzitter. Bekènd oet dae tied is zien oetsjpraak: "Bie VVV óntsjtaet pas paniek, es ‘t beer op is". Dees wäörd höbbe häöm zien laeve lank achtervolgt. Hae goof daomit aan dat ein voetbalclub es VVV moosj lieëre laeve mèt promotie en degradatie en daoróm neet zoa sjnel in paniek moosj rake es de resultate wat minder waore. In ‘t begin van de neugetiger jaore woort hae, nao ‘ne tied lank veurzitter te zeen gewaes, secretaris van de Kamer van Koophandel Noord Limburg. In 1993 woort hae veurzitter van de KNVB es opvolger van Jo van Marle en in 1996 kaom hae in ’t besjtuur van de UEFA. Hae waas ein van de groate animatore achter de organisatie van ‘t Europees kampioensjap voetbal in 2000, same mèt Belsj. Daonao woort hae oet erkentelikheid veur ’t succes van dit kampioensjap beneump tot penningmeister bie de UEFA.
Jeu Sprengers stórf op 69-jaorige laeftied in 't veurjaor van 2008 nao ‘n kortsjtondige óngenaeslike ziekte.
Bie zien indrökwekkende oetvaart woort hae veur zien väöle verdeenste geieërd door UEFA-veurzitter Michel Platini, FIFA-veurzitter Sepp Blatter en KNVB-directeur Henk Kesler en ónger de hónderde aanwezige in de Sint Martinuskirk bevónge zich tal van groathede oet ‘t nationaal en internationaal voetbal, ónger mieë Louis van Gaal, Foppe de Haan, Michael van Praag en John van 't Schip. Van bondscoach Marco van Basten laog ‘ne krans bie de kis, met de teks: "Een laatste groet". De voetbalwaereld is häöm vol dank versjöldigd.
Trivia
[bewirk | brón bewèrke]In ‘t carnavalssezoen 1972-1973 waas Jeu Sprengers prins van de Venlose carnavalsvereiniging Jocus ónger de naam Prins Jeu I. In 1993 woort hae geridderd mèt de Orde van de Gulden Humor. In 2000 woort hae koninklik óngersjeie "vanwege zien verdeenste veur ‘t Nederlandse voetbal en zien maatsjappelijke en besjtuurlijke verdeenste veur ‘t bedriefslaeve".