Zèspoetege

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

De Zèspoetege (Latien Hexapoda) zien 'nen oonderstam vaan de Gelidpoetege diere. 't Euvergroet deil vaan dees bieste zien insekte, meh nog drei aander klasse hure debij.

De Zèspoetege zien bekind vaanaof 't vreug-Devoon, zoe'n 411 mieljoen jaor geleie. Traditioneel weure ze geach 't ingste verwant te zien aon de väölpoetege (Myriapoda: doezendpu en mieljoenpu); recint oonderzeuk zèt ze korter bij de sjaoldiere.

Hun lieve bestoen oet drei oonderdeile: kop, thorax en achterlief. De kop is samegestèld oet e prostomium, wat miestal de ouge dreug, en zès samegekloonke en sterk in gruutde gereduceerde segminte, die oonderdeile wie de veulspriete (neet presint bij de Protura), de binneste en boeteste kaoke en 't labium drage. D'n thorax besteit oet drei segminte, edert mèt ei paar pu zoetot de bieste de zès pu oet hunne naom kriege. Väöl insekte höbbe ouch e paar vleugele op twie vaan de drei segminte, meh bij de aander drei klasse koume die neet veur. 't Achterlief is dèks groet en besteit oet e groet aontal segminte, meh is sterk gereduceerd (wiezier varieert per taxon) wat betröf functies: 't herberg veural nog de geslachsdeile.

De indeiling is zoe: