Groeëte Meulebaek

Dit artikel is gesjreve in 't Venloos. Ómdat 't plaatsgebónge is, maogs doe 't ómzètte nao 't Wânsems, es te dit dialek sjpriks.

---

De Groeëte Meulebaek beej Mieëldere.

De Groeëte Meulebaek is 'n middelgroeëte baek die weurt gekinmèrk door 'n meanderend petroeën. Ze óntspringk óp twieë plèkke, waorónger kórt beej De Grashook, en beej 't netuurgebeed Mariapieël. Ze struimp dan wiejer via de Schatberg en ónger d'n iezerwaeg Eindhove-Venlo beej Zaerem, Hórs, Mieëldere en Tiender. Beej Hórs struimp ze parallel aan de snelwaeg A73, waor ze ouk óm de Kestieëlruïne van Hórs hin geit. Via de have van 't dörpke Wânsem kump ze oetindelik in de Maos terech. De baek is heejmei zoeën 35 kilometer lang.

Óp de Schatberg beej Zaerem ligk 'n 200ha groeët netuurgebeed: 't Meulebaekdaal. 't Is 'nen Aerlebruuekbós in 'n rilletief smaal en deep daal, wier zeen d'r populere en moerasechtig en blomeriek land. Heej perbeert me de kleinschaoligheid van 't landschap te ónderhalde. Ouk waor de baek in de jaore dèrtig gekanaliseerd, meh rónd 't jaor 2000 haet me de loup van de Groeëte Meulebaek wier laote meandere. 'n Aantal wandelpajer zeen oetgezat, waorvan de bekindste ligk beej 't AC-ristaurant aan de Verzórgingsplaats De Wuust aan de A73.