Wouf

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Oonder wouf of wolf versteit me alle neet-gedomesticeerde oondersoorte vaan Canis lupus. Dit slut d'n hoond (Canis lupus familiaris) en d'n dingo (Canis lupus dingo) oet. Sommege aander leje vaan 't geslach Canis (Hun) weure ouch wouf geneump. 't Bies is e zoogdier oet de orde Roufdiere (Carnivora) en de familie Hoondechtege (Canidae). De wouf kump veur in groete deile vaan Eurazië en Noord-Amerika, zoewie vaan oersprunk ouch de kös vaan Noord-Afrika. In groete deile vaan zie bereik is 'r oetgereujd, um de sjaoj die 'r aon sjäöp en aander klein vee deit, zoewie um de (irreëel) angs tot 'r lui aonvèlt. De lèste jaore breit zie leefgebeed ziech weer oet, door op herstèl geriech natuurbeleid. In de naozomer vaan 2011 kaom 'r oongeveer geliektijeg es daolgas Nederland en 't Belsj in, naotot 'r dao sinds de negentienden iew neet mie waor gezeen. de woernumming in Nederland kós evels neet mèt zekerheid weure vasgestèld. Twie jaor later woort 'nen doeje wouf in Nederland es hoax oontmaskerd. Natuurorganisaties gónge evels oet vaan zienen trökkier op korten termijn; in 2014 woort de wouf tot beheujde soort verklaord.^[1] In miert 2015 leep tot slot veur 't iers mèt zekerheid 'ne wouf op eige krach Nederland in; 't bies kaom in Drenthe en waor kort teveure al aon d'n Duitse kant vaan de grens gezeen.^[2]^[3] In december 2017 trok 'ne wouf door Nederlands en Belsj Limburg.^[4] In de ierste maonde vaan 2018 woorte meldinge vaan wouver gedoon in Roerdale en De Melderse, allewel ze ouch in twiefel weure getrokke.^[5]^[6]

Rifferenties

Wiktionair

Zeuk de definitie, vertalinge, oetsjpraok en dialekvariante van wouf op in de Wiktionair.

Dit artikel is e sjtumpke. De kans Wikipedia helpe door 't aan te völle

[1] Nu.nl - Wolf wordt beschermde diersoort

[2] Nu.nl - Wolf na 150 jaar terug in Nederland

[3] NOS.nl - 'Ik dacht dat het een hert was'

[4] 1limburg - 'Wolf Naya bijt schapen dood'

[5] 1limburg - 'Automobilist ziet wolf lopen in Melderslo'

[6] De Limburger - Stichting: wolf in Roerdalen was mogelijk herdershond

[1]

[2]

[3]

[4]

[5]

[6]