Visum

e Visum (pl. visa, visums of - vaanoet 't Duuts - Visen) is 'n - normalerwieze in e reisdocumint verwèrkde - aonbesteiing um nao 'n aander, vreemp land te gaon veur doorreis of bestumming.

Door de Schengen-acquis (geteikend in 1997-1999) mage Börgers vaan de Europese Unie ziech vrij verplaotse binne de Schengenzone (dee bekans de ganse Europese Unie besleit, op Ierland en Cyprus nao). Dit is oetzunderlek en veur e bezeuk tösse de meiste len in de wereld is 't eint of aander visum nudeg es me vaan plan is um d'r veur 'ne langeren tied te zien.

Duusterblauw: Lede vaan de Schengenzone - Börgers vaan de Europese Unie die in deze zone woene hove gei visum te hole um ziech te verplaote vaan 't eint nao 't aander land; Liechblauw: aon d'n eine kant, Lidstaote vaan de Europese Unie die gei lid vaan de Schengenzone zien (de eilen Ierland en Cyprus) mer wel börgers vaan de Europese Unie op bekans gelieke voot mote behandele es de eige nationaol börgers - en aon d'n aandere kant, gebeje die officieel neet in de Schengenzone ligke mer wel deil oetmake vaan 't soeverein gebeed vaan 'ne Schengen-lidstaot (wie Greunland veur Denemarke en Frans Guyana veur Fraankriek); Greun: Visumvrij touwgaank nao en oet de Schengenzone veur 90 daog binne 'n tiedbestèk vaan 180; Gries: Visum nudeg nao en eot de Schengenzone; Duustergries: Visum nudeg, ouch es me hei in de "transit" aonkump um nao 'nen aandere Schengen-staot te gaon.

't Woord "visum" stamp oet 't Latien. Videre beteikent "zeen" en visum beteikent daan zoeväöl es 't "Gezeene", ofwel "dat wat gezeen is". In 't Limbörgs, Nederlands en Duuts weurt dit woord gebruuk. In aander taole, wie 't Ingels en Frans, weurt oet datzelfde Latien woord de pluraol vervoging visa gebruuk ("de gezeenene" of "die die gezeen weure"). In 't miervoud weurt in 't Ingels en Frans daan visas (ofwel visa's) gebruuk. Door de veringelsing vaan Europese taole wie 't Limbörgs, Duuts en Nederlands weure de wäörd "visa" en "visa's" ouch ummertouw dèkser neve "visum" gebruuk in d'n alledaogse taol vaan Nederland, Belsj en Duitsland.

Väöl len spegele hun visumrechte aon mekaar. Zoe laot de Europese Unie Braziliaonse börgers mèt e sömpel toerismevisum veur 90 daog touw in de Schengenzone en daotegeneuver mage inwoeners vaan de Schengenzone dat ouch in Brazilië doen. 't Is minder gebrukelek es len 'n oonevewiechteg visumbeleid nao mekaar touw höbbe.

Brón

• Corresponderend artikel vaan de Duutstaolege Wikipedia