Tugunbulak
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Tugunbulak is 'n rewienestad vaan middeliewsen oersprunk in Oezbekistan. Ze ligk in 't bergechteg ooste vaan 't land, binnen 't Zaamin Nationaol Park, neet wied vaan de grens mèt Tadzjikistan. Op vief kilometer vaan Tugunbulak ligk Tashbulak, 'n vergeliekbaar vindplaots. De naom Tugunbulak is medern; me wèt neet bij wat veur naom de bewoeners de stad zelf neumde.
Tugunbulak en Tashbulak waore vaan zoeget de zèsde tot en mèt de tiende of èlfde iew bewoend. De stad leefde evels vaan de mijnbouw, en wel vaan de iezerwinning en -bewèrking. Via de Zijroute, die ouch nao Tugunbulak aoftekde, woort die waor verhandeld. Tugunbulak ligk op 'n huugde vaan 2000 tot 2200 meter; 't waor de groetste middeliewse stad die me in Centraol-Azië op zoe'n huugde nog vint. Reste zien gevoonde vaan talloes walmör, weeg, terrasse en wachtories. Ze kin in theorie tiendoezende bewoeners höbbe gehad.
Tugunbulak woort in 2011 oontdèk door e team oonder d'n Amerikaon Michael Frachetti en d'n Oezbeek Farhod Maksudov. Wie ze in 2015 potsjervele aon 't verzamele waore, wis 'ne boswachter ze te zègke tot die in zie bos eve wijerop ouch te vinde waore. Nao oonderzeuk bleek de boswachter zie hoes op 'ne citadel te stoon. In 2022 begós me mèt opgravinge en Lidar-scans. De site bleek ziech oet te strèkke euver 'ne groond vaan 120 hectaar. De bevindinge woorte ind 2024 in Nature gepubliceerd.
Me heet de oontdèkking vergeleke mèt Machu Picchu in Peru.
Extern links
[bewirk | brón bewèrke]- Artikel in Nature (allein tege betaoling te leze)
- NOS - Oezbekistan heeft zijn eigen Machu Picchu aan eeuwenoude handelsroute