Toontje Lager

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Toontje Lager waor 'n Nederlandstaolege popgroop oet Wageningen (provincie Gelderland), die vaan 1978 tot 1985 bestoont. De band maakde synthesizerpop mèt invlode oet reggae en soms disco. Heer waor eine vaan de exponinte vaan de raasj um Nederlandstaolege pop begin jaore tachteg.

Bezètting

De oersprunkeleke bezètting waor:

• Bert Vermaas, zaank
• Bert Hermelink, örgel
• Jan Verver, gitaar
• Huub van Melick, basgitaar
• Joost Witte, slaagwerk

Op 't memint vaan d'n doorbraok waore Vermaas en Verver vervaange door respectievelek:

• Erik Mesie, zaank (sins 1980)
• Gerard de Braconnier, gitaar (sins 1979)

In 1983 gónge De Braconnier en Van Melick ouch oet de band um plaots te make veur:

• Rob Winter, gitaar
• Leon Giesen, basgitaar

Historie

De historie vaan Toontje Lager begint in 1978 es frivool projek vaan Bert Hermelink, dee de leedsjes sjrijf. De band hèt daan Maandverband: de oersprunkeleke bedoeling is um mer 'ne maond bijein te blieve. D'n insteek is cabaretesk; daorum weurt in 't Nederlands gezoonge. Zenger Bert Vermaas trèk de aondach door väöl tösse de leedsjes door te praote. In 1979 verandert me de naom in Toontje Lager. De band raak in 't clubcircuit vrij snel bekind en heet zienen tied mèt: in 1979 kump Nederlandstaolege popmuziek good in de belaankstèlling. Ze weure geïnterviewd veur 't blaad OOR en draoge e leedsje (Kontaktrock) bij aon de verzaomelelpee Uitholling Overdwars (boe-op oonder andere ouch de oerversie vaan Doe Maar te hure is). Later kump nog de ierste single oet, Ja verrek.

Erik Mesie is op dat memint al zenger vaan 'n Ingelstaoleg bandsje. Op kamers in 't Arnems Spijkerkwartier kump heer in contak mèt Gerard de Braconnier, aon ween heer demobendsjes vaan ziene band liet hure. De Braconnier is oonder indrök vaan Mesie zien stum en introduceert häöm es vervaanger vaan de vertrèkkende Bert Vermaas. Oondaanks tot Mesie noe 't geziech vaan Toontje Lager gewore is, blijf 't sjriefwerk in han vaan Hermelink. Mèt Mesie weure 'ne nuie single, Achter de wolken, en 't ierste album, Toontje Lager, oetgebrach, allebei nog zoonder hitsucces.

Dit verandert in 1982, es de Nederlandstaolege muziek mainstream weurt. Doe Maar, Toontje Lager en Het Goede Doel breke oongeveer tegliek door en stoon de twiede helf vaan 1982 en (veural) de ierste helf vaan 1983 aon d'n top. 't Singlesucces vaan Toontje Lager blijf besjeie: d'n doorbraok Net als in de film kump op plaots 31 vaan d'n Top 40; de groetste hit Stiekem gedanst kump neet hoeger es 8. De elpees, veural Stiekem dansen, doen 't beter: deze en ziene veurgenger Erop of eronder weure goud (>50.000 stökker verkoch). E wijer radio-succeske is Ben jij ook zo bang, wat in de tipparaad blijf haange meh boevaan de b-kant In gedachten tot "b-kant vaan 't jaor" weurt oetgerope. In 1983 krijg de band (zjus wie collega's Het Goede Doel) vaan de stiechting Conamus 'n Zèlvere Harp.

Oonder de groete drök vaan 't succes verlaote dat jaor Gerard de Braconnier en Huub van Melick de band. De hype roond Toontje Lager liekent daan wel veurbij: ind 1983 en later maak de band gein hits mie. De concerte blijve evels wel allemaol oetverkoch. In aprèl 1984 stop bovedeen Doe Maar demèt, wat 'n drastische vermindering in de aondach veur Nederlandstaolege pop beteikent. De elpee Even goede vrienden, oetgebrach in 1984, haolt neet 't succes vaan zien twie veurgengers. 't Definitief ind kump es creatief middepunt Bert Hermelink in 1985 de band verliet.

Nao 't oetereinvalle vaan Toontje Lager begint Erik Mesie aon 'n solocarrièr. Zie groetste succes weurt de new wave-hit Zonder jou ('n vertaoling vaan Ohne dich vaan Münchner Freiheit), wat in 1986 op de achste plaots kump (in e jaor boerin Nederlandstaolege pop 't slech deit). Laankdorege populariteit hèlt 'r evels neet vas. In de jaore negeteg koume de leie vaan de band aof en touw weer bijein veur reünieconcerte. De plaotemaotsjappij brink dao-op hun albums oet op cd. Dit herhole ze in de ierste tien jaor vaan de 21e iew. Bert Hermelink sjrijf aof en touw werk veur ander artieste. Basgitaris Leon Giesen nump in 2004 same mèt Jack Poels vaan Rowwen Hèze 't album Holland America Lijn op.

In september 2016 kundegde Erik Mesie aon tot Toontje Lager weer op tournee zouw goon, en wel in 'n nui bezètting. Iers wouw Mesie dit mèt de aw bandleie doen, die dao evels neet enthousias euver waore. De zenger meinde evels tot heer 't rech had ouch allein de naom Toontje Lager te drage, umtot 't publiek zien stum es zoedaoneg herkós.

Werk

Albums

Mèt noteringe in de Nederlandse albumparaad

• Toontje lager (1980)
• Erop of eronder (1982, 12)
• Stiekem dansen (1983, 2)
• Even goede vrienden (1984, 14)

Singles

Mèt noteringe in de Nederlandsen Top 40

• Ja verrek (1980 of 1979)
• Achter de wolken (1980)
• Net als in de film (1982, 31)
• Ben jij ook zo bang (1982, tip)
• Zoveel te doen (1983, 19)
• Stiekem gedanst (1983, 8)
• Vroeg of laat (1983, tip)
• Alle dagen dorst (1984, tip)
• Niemand die het weet (1984, tip)
• Als ik 'n meisje was (1985)

Literatuur en bronne

• Biografie op de site vaan 't Nationaal Popinstituut
• Erik van den Berg, Roy Mantel en Pieter van Adrichem, Klare taal. 15 jaar Nederlandstalige rock. Groninge, 1994: pp. 28-37