Superheld

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

The Flame, 'ne zier vreuge superheld oet de jaore daarteg, waor vaan groeten invlood op Superman en aander superhelde.

'ne Superheld (vertaoling vaan Ingels superhero) is e type personaasj in versjèllende verhaole, dee mèt naome in Amerikaonse stripverhaole en teikefilms veurkump.

Kinmerkend veur 'ne superheld is tot heer superkrachte heet, boveminseleke en dèks bovenatuurleke krachte die häöm d'n oonbetwisten held vaan zie verhaol make. Dit is 't belaankriekste versjèl mèt 'ne gewoene stripheld, dee in principe nog minselek is. In 't gemein vech heer tege oonrech; soms gief 't 'ne 'superfiloe' (supervillain) dee ziene vaste vijand is. Bij al zien oongeluifeleke krach heet de superheld dèks ein zwaakde, 'nen achilleshiel, dee zien vijande kinne benötte.

Hiel dèks kleit de superheld ziech ouch in opvallende pekskes, in 't gemein 'n ing pak wat zien spiere betuint, en dèks 'ne cape. Soms heet de superheld 'nen helper ('sidekick'). Vaanajds is de superheld mannelek en blaank, al zien door de jaore heer genóg alternatieve striphelde gemaak. In 't gemein höbbe superheldeverhaole neet väöl deepgaank, al weurt soms wel ingegaange op de lestege jäög dee de superheld tot zien heldedaode heet gebrach.

Veurluipers neet tenao gezag liet me de superheldetraditie beginne in 1938, wie d'n ierste Superman-strip versjeen. Superman, 'ne minsechtegen boeteneerdse vaan de vergaange planeet Krypton, is nog ummer 't stereotyp vaan de superheld boe alle aandere personnages vaan dat typ nog ummer aon weure aofgemete. E jaor later woort ouch Batman bedach, 'ne get duusterderen held. Superman en Batman weure allebei oetgegeve door DC Comics. Belaankriekste concurrent is 't ouch al Amerikaons Marvel Comics, boe me oonder mie d'n Hulk en Spiderman vaan kint. Dees superhelde höbbe e minder perfek uterlek en höbbe hun superkrachte dèks door ein of aander oongelök gekrege.

In Europa en Japan sloog 't typ vaan de superheld minder aon. Op 't Belsj woort 't wel touwgepas door Willy Vandersteen, dee mèt Jerom, 'ne spinoff vaan Suske en Wiske, de gelieknaomege krachmins es superheld deit optrejje.